Pynkreh ka sorkar ban pyniasoh aadhaar bad rashon, 11 lakh ngut buh thong ban pyndep shuwa kan kut por

Syllad | The Rising MeghalayaApril 5, 2025

U Myntri ka Tnad Food & Civil Supplies & Consumer Affairs ka sorkar Jylla,  u Bah Comingone Ymbon ha ka 4 tarik Iaiong u la plie ia ka Mission Mode Project na ka bynta ka jingpyniasoh ia u Aadhaar bad ki Card Rashon khnang ban pynthikna halor ka jingkhuid  bad ka jingiaid beit ha ka jingsam ia u khaw rashon sha ki nongioh jingmyntoi katkum ka National Food Security Act (NFSA).

Haba kren sha ki lad pathai khubor, u Ymbon u la pynpaw halor ka jingdonkam ba kyrkieh ban pyntreikam ia kane ka mission hadien ba ka Sorkar India ka la ai por khatduh da kaba pynjlan haduh ka 30 tarik u Jylliew ban pyndep 100% ia ka jingpyniasoh ia u Aadhaar bad ki Card Rashon.

“Ha Meghalaya haduh mynta ki don tang 48.77% ki nongioh jingmyntoi (kata kumba 10 lak ngut ki briew) kiba la pyniasoh ia u Aadhaar. Hynrei, ki dang don sa 11 lak ngut ki nongioh jingmyntoi ia kiba dang dei ban pyndep ha kine ki 84 sngi ki ban wan,” u la ong da kaba bynrap ba kane ka jingpyniasoh kan iarap ban pynduh jait ia ki jingleh kam thok bad ka ban khanglad na ki jingpyndonkam bakla.

Halor ka jingkongsan ka jingpyniasoh Aadhaar, u Myntri u la ong kane kan pynthikna ba ki mar bam kin poi sha kito ki longiing kiba dei hok ban ioh, ki nongrep, ki nongbylla sngi bad ki longkmie ha ki thain nongkyndong bad ki jaka sorkar haka Jylla.

“Kane kan pynkhlain halor ka jinglong khuid da kaba weng noh ia ki nongioh jingmyntoi ki bym shym la don bad ban khanglad halor ki jingpynthud ia ka rukom sam ia ki marbam hapoh jong ka NFSA,” u la bynrap.

U la ong ruh ba ki Deputy Commissioner, Sub Divisional Officer bad ki Block Development Officer kin lamkhmat ha kaba iadei bad ka jingpyntreikam ia kane ka mission hapoh ki shnong ki thaw.

Katkum ka jingpynpaw jong u, u la ong ba kito kiba don ia ki Card Rashon ki dei ban leit mih sha ki jaka sam rashon, ki ophis block lane sha ki ophis ka tnad supply jong ki district ha ryngkat ki Aadhaar jong ki naduh ka 14 tarik Iaiong.

Nalor kata u Myntri u pyntip ruh ba kat haduh mynta ki don 4500 tylli ki jaka ne dukan sam rashon ha kylleng ka jylla kin long kum ki jaka pynrung kyrteng na ka bynta ban pyniasoh ïa u Aadhar bad ki card rashon ha ryngkat ka jingkyrshan lang da ki bor pyniaid shnong.

Ha kajuh ka por u pynpaw ruh ka jingsngew skhem ba ka Meghalaya kan lah ban kynjoh sha ka 100 pecent ka jingpyniasoh Aadhaar lyngba ka jingiatreilang jong baroh ki kynhun kiba don bynta.