Pynksan u Director ba ka NEIGRIHMS ka bud ryntih ia ki kyndon ka DoPT ha ka jingthungkam

Syllad | The Rising MeghalayaApril 12, 2025

U Director ka North Eastern Indira Gandhi Regional Institute of Health & Medical Sciences (NEIGRIHMS) u Prof. (Dr) Nalin Mehta ha ka 11 tarik Iaiong u la pynskhem ba ka Institute ka la bud beit ryntih ia ki kyndon thungkam thungjam katkum ki kyndon ba la buh beit ryntih da ka Department of Personnel and Training (DoPT) bad pynshai ruh halor ki katto katne ki bynta kiba iadei bad ka jingpynrung kam kiba dang iaid shakhmat.

Kane ka jingpynshai jong u Director ka long shibynta ka jingsngewkhia ba la pynpaw da ka Khasi Students’ Union (KSU) bad ka seng Hynniewtrep Youth Council (HYC), kiba la pynlong dang shen ia ki jingiakhih hapoh kane ka Institute.

U Dr Mehta u la ong ba ka jingpyllait ia ki jingpynbna halor ki kam kiba lait kam dei satia ka Fresh Recruitment hynrei ka dei ka Backlog Vacancies kaba mih na ka jingbym pdiang, ka jingbym wan pyniasoh sha ka kam, ka jingiehnoh kam ne ka jingbym don ia ki kyrtong kiba biang ha ki kyrdan bapher bapher lyngba ki jingkhot pynrung kam kiba la dep.

“Baroh ki jingpynrung kam ha NEIGRIHMS la pynlong ha ka lynti kaba thikna, bad ha kane ka kynti kaba mynta ka dei kaba la pynlong katkum ka ‘Model Roster bad Regional Roster’ kaba long katkum ki kyndon bad jingbthah jong ka DoPT ban pynthikna halor ka jingbud ryntih halor ka bhah thungkam ne ka ‘Reservation Policy’ na ka bynta ki SC, ST, OBC, EWS, bad PwBD.”

Haba pynpaw thik halor ka jingsngewkhia ha kaba iadei bad ka jingioh rungkam jong ki trai muluk, u Director u la ong, “La pyllait a ki jingpynbna lait kam ha NEIGRIHMS lyngba ki kotkhubor ka Jylla kumjuh ha ki Khubor Laitkam ne Employment News katkum ki kyndon ba la bthah bad la buh ruh ia kane lyngba ka website jong ka Institute na ka bynta ka jingiashim bynta jong kiba bun ki trai muluk.

Halor ka jingsngewkhia kaba iadei bad ka ratio thungkam Nursing Officer, u Director u pynshai ba kam shym la don kano kano ka kyndon ha ka Recruitment Rule na ka bynta 80-20 hapdeng ki kynthei bad shynrang.

“Ka NEIGRIHMS ka la kyrpad ia ka Ministry of Health and Family Welfare ka Sorkar India ban pyntreikam ia kum kane ka kyndon ha u bnai Naitung 2024, hynrei ka Ministry ha u bnai Nailar 2024 ka la aijingmut ban ym pyntreikam ia kaba kum kane ka jingbhah. Ka jingkyrpad kaba don ia ka jingpynksan kaba khlain halor kane la phah sha ka Ministry ha kine ki khyndiat sngi ba la dep,” u la ong.

Ha kaba iadei abd ki centre ban pynlong ia ki eksam na ka bynta ka Computer-based tests (CBT) ka ban pynlong da ka  HLL Life Care Limited, ka kompeni ka sorkar pdeng, u Dr Mehta u pyntip ba la pynkhreh ia ki sienjam ban pdiang ia kiba bun ki samla ka jylla Meghalaya ha ki jaka thoh eksam ha Meghalaya. Hynrei, lada ki nongiakhun ia ki eksam ki la palat ia kaba lah ban pynlong ha Meghalaya kumta ruh kin hap ban leit sha ki centre kiba don marjan kum ha Guwahati, Assam.

“Nalor kata ia kane ka eksam kaba ha kane ka kynti kaba mynta yn pynlong da ka NEIGRIHMS lyngba katei ka agency ba la kdew haneng bad ym da ka NORCET kumba la leh ha ka jingthungkam ba la dep.”

Haba kren halor kawei pat ka mat, u Dr Mehta u la pynthikna halor ki lad ki lynti kiba khlain kiba la don hapoh NEIGRIHMS ban pynthikna ia ka jingshngain jong ki nongpang, ban pynneh ia ka jingshngain ka jinglong jingman hapoh ka jaka sumar bad ban pynioh ia ka sawdong sawkun kaba shngain khamtam eh na ka bynta ki nongtrei kynthei bad ki nongpang kumjuh.

Shuh shuh u Director u la pynkut da kaba pynthikna ba ka NEIGRIHMS ka kut jingmut skhem halor ka jingpyniaid beit ia ki kam ki jam ha ka lynti kaba khuid ba suba bad ka jingbud pyrkhing ha ki jingpynrung kam katkum ki kyndon jong ka sorkar pdeng.