Pynksan u ma Lahkmen Rymbui ïaki 6 shnong ba pyrshah theh ñiut ha Mynkjai, ym pdiang iaka Quit Notice ki waheh chnong Jowai

Syllad | The Rising MeghalayaAugust 11, 2021

U Myntri ka tnad kam Pohïing u ma Lahkmen Rymbai haka sngi Balang ula ong ka rai quit notice ka Synjuk ki Waheh Chnong Jowai’s sha ki synjuk waheh shnong War Jaintia bad ki shnong ba pyrshah iaka jingtheh ñiut ha Mynkjai ka long kaba ym lah satia ban pdiang.

Haba kren bad ki nongthoh khubor, u ma Lahkmen ula ong “Ka rai jong ka Synjuk Ki Waheh Chnong Jowai ban ai quit notice iaka KSU War Jaintia Circle, bad ki 6 shnong ka long ka bym lah satia ban pdiang, hynrei nga kyrmen ban pynjem ia kane ka jingeh ha kaba iadei ban iakhun iaki ñiut ka dei tang da kaba iatreilang ryngkat.”

Ula kubur ba ki nongshong shnong ka Jowai kila kynduh mawsiang bha halor kane ka jinglum thup ki ñiut la bun taiew ha Jowai, hynrei kine ki 6 shnong pat kila shem jingeh la palat 20 snem namar bala theh ne pyllang iaki ñiut ha Mynkjai bad kila iakhih naka por shaka por.

Da ki spah ton ki ñiut kila sahkut ha Iawmusiang hadien bala pyrshah ki 6 shnong bad ka KSU iaka bor synshar district kaba kynthup iaka JMB ban theh ñiut ha Mynkjai.

U Ma Rymbui, ula pynksan ba ka jingiakhih pyrshah ki 6 shnong ka long kaba shong nongrim bad ka por kala dei eh baka sorkar kan wad ki lad ki lynti ban pynjem iaka jingeh ha kaba iadei bad ka jingiakhun bad ki jaboh jabain.

“Ngim dei ban lehrain iaka jingkitkhlieh jong ngi, ngi shim ia baroh ki kam tang naka bynta shipor, bad kane ka kam shipor kan nym pynjem iaka jingeh bad ka por kala dei eh iaka sorkar ban shim iaki sienjam kiba neh junom ha kaba iadei bad ki niut ki nier,” la ong u ma Lahkmen.

“Kawei lada ngi kren iaka jingpynbha pynmiat la ha sor ne nongkyndong bad kane ka mat kala sdang na sor bad hadien kan poi sha nongkyndong hynrei kan sa poi ka por ba naka jingbun briew baroh ki donkam jaka,” ula ong shuh shuh u ma Lahkmen.

U kyrmen ba ka sorkar bad ka bor synshar district bad ka district council kin wad ki lad ban pynjem ia kane ka jingeh da kaba wad iaka jaka bret ñiut shawei ban pynbeit iaka jingeh shisyndon.

Ula ban jur ia baroh ban ai iaka jingiatreilang bad ka sorkar halor ka kam pynlang ñiut bad ula ong ka jaboh kam dei tang ka jaboh ka dei ruh ka lad ban pynmih pisa bad ka lad kamai ia ki briew.