Pynksan u VC ka NEHU halor ka jingthung ia u Prasad kum u Consultant, khot ia ka JAC sha ka jingiakren

Syllad | The Rising MeghalayaNovember 5, 2023

Na ka liang u Vice Chancellor jong ka skulbah North Eastern Hill University (NEHU), u Prof PS Shukla u la ong ba ka jingthung ia u Rohit Prasad kum u technical officer cum senior consultant ka dei kaba la leh hadien ba la shim ia ka jingmynjur da ka Executive Council (EC) ka University.

Haba kren sha ki lad pathai khubor haka 4 atrik Naiwieng, u Prof Prabha Shankar Shukla ula kyntait iaka jingdawa ka JAC da ka ba ong ba kam shym la don kano kano ka jingthungkam beain namar u VC u don ia ka bor ban thung shipor na ka bynta baroh ki Group A / Group B post katkum ki kyndon ain kiba iadei bad ka jingtreikam bad ka jingthung ia u Rohit Prasad kam dei ka kam permanent, bad ba kane ka jingdawa jong ka JAC ka dei kaba khlem nongrim. Ha kaba iadei bad kane ka mat u la ong u long ruh uba kloi ban khot ia ka JAC sha ka jingiakren.

Nalor kata u la ong ruh ba yn ym lah ban weng kam noh ia u Rohit khlem kano kano ka daw kaba biang, bad lada ka JAC ka lah shisha ban kdew ia ki daw kiba shong nongrim ka dei ban ujor da kaba kdew shai halor ki daw.

Kane ka jingpynpaw jong u VC ka la wan long ruh shi sngi hadien ba ka Joint Action Committee kaba kynthup ia ka NEHUTA, NEHUNSA bad NEHUSU ki la ai por 10 sngi ban wengkam noh ia u Prasad.Na ka liang ka JAC ka la dawa ruh ba ka tulop ba la siew sha u Prasad dei ban siew na ki jingioh jong u VC bad ym napoh ka account jong ka University.

Na ka liang u VC u la ong ba ka jingthung ia Rohit Prasad da ka kontrak na ka bynta lai bnai bad ka jinglah ban thung biang ka shong ka jinglah treikam jong ki bad shuwa ban thung la khot ia ia ki aplikoshon hynrei ym don ba  thep kumta namar ka jingdon kam kyrkieh ka kam la thung kontrak noh ia u ophsiar ba kyrpang.

“Kham hashwa ngi la thung ia ka post nonghikai, mynta ngin thung sa ha ki post non-teaching. Haduh u bnai Nohprah ne Kyllalyngkot u ban wan, Nga dang don ruh ia ka bor ban pynrung ha ka kam finance officer, university engineers bad ruh na ka bynta ka kam registrar jong ka University,” ong shuh shuh u VC jong ka skulbah.