Pynkup burom ka Dorbar Shnong Lamin Pyllun ïaki lai ngut kiba pass bha haka matrik

Syllad | The Rising MeghalayaJune 2, 2019

AMLAREM: Ka Dorbar Shnong Lamin Pyllun kala pynkup burom ïaki lai ngut ki khynnah skul kiba pass bha bad wanrah ka nam ka burom jong ka shnong Lamin haka eksamin matrik.

Kine ki khynnah kiba shah pynkup burom ki kynthup a u Dimarkithmu Gayang uba ïoh rung haka kyrdan First Twenty ha ka SSLC haka resol kaba pynbna ka MBOSE dangshen.

U Deiwamang Khonglah bad ka Saia Lamin ruh kila shah pynkup kiba pass bha. Kine baroh lai ngut ki dei ki khynnah skul ka Jawaharlal Nehru Memorial Secondary School, Lamin.

Na kane ka skul 24 ngut kila iakhun iaka eksamin matrik bad 21 ngut kila pass.
Ka dorbar shnong kala pynkup burom ïa kine ki khynnah da ka syrnod bad ka pisa ha kaba u Dimarkithmu ula ïoh pdiang ka song pisa T.10 hajar bad u Deiwamang Khonglah bad ka Saia Lamin kila ioh pdiang mar T.3 hajar.

U MLA uba War Jaiñtia bad uba long u Myntri ka Pule ka Puthi Ma Lahkmen Rymbui ula long kum u kongsan. Haka jingkren jong u, ula pynpaw ka jingkmen bad ula iaroh iaki khynnah skul kiba na War Jaiñtia kiba la lah ban wanrah ka nam burom ka thain war baroh kawei.

Ula ai khublei ïa u Dimarkithmu Gayang, Lavinia Mebalari Myrchiang bad u Kyrmen Hemiat Rymbui kiba la rung haka kyrdan First Twenty bad kyntu ïa ki bad kiwei kiwei ki khynnah skul ba kin nang trei shitom shuh haka pule ka puthi khnang ba kin poi sha ka thong.