Pynkup burom ka HYC iaki doctor bad Asha ha Amlarem

Syllad | The Rising MeghalayaJanuary 18, 2021

Ka Hyniewtrep Youth Council (HYC) War Jaintia Circle haka sngi Saitjain ka taiew kaba la dep kala pynkup burom iaki doctor bad Asha kiba trei ha Amlarem Sub Division ha Syiem Jingsuk, Hall.

Kane ka jingpoynkup burom ka long shi bynta ban ai burom iaki doctor bad ki Asha kiba trei ha ki jaka sumar bapher bapher jong ka tnad ka koit ka khiah

U Henry Manar u ula long kum u kongsan ha kane ka jingpynkup burom ryngkat ka jingiadon lang u Vice President CEC seng kmie u ma Donboklang Kharlyngdoh, u incharge ka Jaintia hills District u ma Rockerster Warjri, Yoodahunki Shylla bad Tohmondiam Mukhim president bad general secretary HYC War Jaintia Circle  lem bad kiwei kiwei.

U Dr Arwin Khonglah ula ong “Ki nongtrei Asha ki dei kita ki shipai kiba la iarap bad ia don ryngkat bad ngi bad haba don kino kino ki kam kyrkieh haki shnong ki thaw kiba ki ia mih khamtam haka por Lockdown ban leit jurip ia kiba shong quarantine. Naka liang jong nga, nga pynpaw ka jingsngewnguh iaki Asha kiba la trei met bad mynsiem haka por Lockdown.”

Shuh shuh  u Dr Arwin u la pynpaw ka jingsngewnguh shikatdei eh iaki dkhot ka HYC kiba la mih shakmat ban iatrei lang ryngkat bad ki khamtam eh haka por Lockdown.

U ma Henry Manar u la ong “To ai ba kane ka jingtrei mon sngewbha ka jong phi kan iai neh bad to nang leh kham bha shuh shuh na ka bynta ka miat ka bha ka imlang ka sahlang.”

Hadien katei ka jingpynkup burom, la ioh ruh ban pynkha sa iaka HYC Padu unit bad la ioh ruh ban pynthymmai iaki nongkitkam ka Amlarem unit hakaba la pynbam smai iakitei ki ar tylli ki unit da u Vice President CEC seng kmie u ma Donboklang Kharlyngdoh hapoh ka jingpeit ka HYC War Jaintia Circle.