Pynkup burom ka Jylla ia ki nongjop ha ka World Arm Wrestling; pynbna u CM da ka Inter Constituency Football Tournament

Syllad | The Rising MeghalayaSeptember 7, 2024

U Myntri Rangbah ka Jylla u Conrad K Sangma haka 6 tarik Nailur, u la leit iashim bynta ha ka jingialang pynkup burom ia ki nongjop ha ka World Arm Wrestling Championship kaba la long ha Moldova.

Ha kane ka prokram ba la khot pynlong da ka Meghalaya Arm Wrestling Association hapoh ka hall jong ka KJP Assembly la ia don lang ruh u Myntri ka Tnad Sports u Bah Shakliar Warjri, MDC Malki, Director of Sports, Pastor Bantei Mylliempdah, President and Secretary of MSOA, Sports Secretary ka KSU Central Body, bad Vice President ka FKJGP nalor kiba haiing hasem jong ki nongjop.

Ha ka jingkren u CM u la ong, “Ngi tip ba kam long kaba suk ban jop ha ki jingiakop ha ka kyrdan jong ka pyrthei ha kano kano ka kam ïalehkai bad ngi mutdur ba kan donkam ïa ka jingangnud, ka jingaiti lut, ka jingïaishah bad ka jingtrei shitom bad ngim ju poi pyrkhat ba ngin lah pynmih ia ki nongjop na ka jylla kaba rit kum ka jong ngi bad kane baroh ka long da ka jingaiei U Blei. Nga sngewkmen ba nga la lah ban iarap ha kano kano ka rukom ha ka liang ka pisa na ka Chief Minister Development Fund”.

Haba pynpaw halor ki sienjam ba la shim da ka sorkar ban kyntiew ia ka sports, u CM u la ong ba ka sorkar ka la bei tyngka bha na ka bynta ka jingtei ia ki madan ialehkai naduh kine ki khyndiat snem ba la dep. U la ong ruh ba ki Sports Association bapher bapher ruh kila ioh ia ki song jingiarap pisa ban pynjanai bad pyniaid ia ki jingialehkai. “Ka don ka jingktah jong ka Meghalaya Games ha kaba ka don ka jingpynbha ia ki madan ialehkai kynthup ha ki skul. Ka don ka jingpynkylla dur ia ki madan ialehkai kiba ju pynlong ia ia ki jingialehkai.”

Kumjuh u CM u la pynbna ruh ba ka sorkar kan sa pynlong ia ka Inter Constituency Football Tournament hapoh ka Jylla ban sei madan ia ka sap ialehkai kiba don ha Jylla ha kaba kin don baroh 60 tylli ki team na baroh ki constituency, kata hadien ba la dep ka Meghalaya Games. Hadien kane u la ong yn pynbud ruh da kiwei pat ki jingialehkai sports.

Na ka liang u Myntri ka Tnad Sports u Bah Shakliar Warjri ruh ha ka jingkren u la ai khublei kyrpang ia ki nongjop ha kane ka jingiakop bad pynshlur ruh ia ki da kaba ong na ka liang ka sorkar kan iai bteng ban ai ka jingkyrshan kaba pura.

Ki Nongialehkai kiba la shah pynkup burom ha kane ka sngi ki kynthup ia ka samla Senebi Syngki (Bronze medalist ha ka iakhun kti ka diang bad ka mon jong kiba 55 kg), Mihsngewbha Rymbai (Silver medalist ha ka iakhun kti ka diang bad ka min jongkiba 80 kg Grandmaster), Starina Jasaiñ (Silver medalist ha ka jingiakhun kti ka diang bad bronze ha ka kti ka mon jong ki 60 kg grandmaster), Hubert Paliar (Bronze medalist ha ka kti ka diang ba 60 kg Para Senior HI category), Margaret Pathaw (Bronze medalist ha kakti ka diang bad Silver medalist ha ka kti ka mon jong ka 60 kg Master Category), Donbor Rumnong uba jop ia ka Mr Asia Pacific Senior Category Gold Medalist bad Overall Men’s Physique 2024 bad ia ka nam First Athlete na Meghalaya ban ioh ia ka PROCARD sha Philippines, Manila City. Johnny Nongrum u dei u nongjop jong ka Middle Weight 6th Bidang Fighting Championship.

Ka kynhun ialehkai ka India kala jop haduh 15 tylli ki takma ha kane ka World Arm Wrestling Championshop ha Moldova ha kaba haduh 9 tylli ki takma ki dei kiba jop da ki nongiakhun kti na Meghalaya.