Pynkup burom ka Khadar Daloi Law College ïaka Sawaka Kynjing

Syllad | The Rising MeghalayaNovember 7, 2019

JOWAI: Ka Khadar Daloi Law College kala pynkup burom ïaka Sawaka Kynjing, kaba la wanrah nam burom ïaka college haka sien kaba nyngkong eh haka jingïaid lynti kaba 33 snem kane ka college hadien ba kala wan nyngkong haka eksamin LL.B kaba pyniaid da ka North Eastern Hill University (NEHU).

Ka Sawaka Kynjing ka dei ka khun jong ka Kong Maygie Kynjing bad u Dr. George Passah ba shong basah ha Mynthong, Jowai, West Jaiñtia Hills District.

Ka Khad Ar Daloi Law College, Jowai bad ka Shillong Law College, Shillong kila long ki ar tylli ki shlem pule kiba la ïohknieh ïa ka kyrdan ba nyngkong bad ba ar ha ka eksamin LL.B jong ka NEHU ha une u snem 2019.

Ka Sawaka Kynjing, ka kaba pule ha Khad Ar Daloi Law College, Jowai ka la ïoh ban knieh ïa ka kyrdan ba nyngkong eh ha kaba kala ïoh 63.27 pc bad ka Shillong Law College kala wan haka kyrdan ba ar ha kane ka eksamin LL.B 6th Semester kaba long ha u bnai Jylliew 2019.

Ki don 126 ngut ki ïakhun iaka eksamin ba pyniaid da ka skul NEHU.

Halor kane ka nam ka burom kaba la wanrah ka Sawaka, ka bor pyniaid ka college kala pynkup burom ïaka haka sngi Palei. Ha ka juh ka sngi la ai khublei ruh ïa u Principal ka college u Jehirul Islam. Ïa ka kam principal kane ka college mynta la shimti da ka kong Rimaya Manar.

Ïa kane ka jingpynkup burom la pynlong da ka Society for the Study of Law (SFSL) , West Jaintia Hills Jowai. Ïaka jingïalang la pyniaid da ka u Ma Rupaia Lamar President SFSL.

La ïoh ruh ïaka jingkren lyngkot na u Dr. PM. Passah President Governing Body, ka Kong R. Manar Principal Khad Ar Daloi Law College bad u VM. Rai dkhot SFSL.

Baroh ki nongkren kila ai ka jingiaroh ïaka Sawaka Kynjing halor ka nam ka burom kaba kala wanrah ïaka college bad kitbok kitrwiang ba nang jop haka jingim bad ki kam jong ka.