Pynkup burom ka Khadar Daloi Law College, Jowai ia iaki 7 ngut ki topper bad kiba pass bha haka eksam NEHU LLB

Syllad | The Rising MeghalayaSeptember 11, 2023

Ka Khadar Daloi Law College, Jowai ha ka sngi Saitjain ba la lah ka la pynkup burom ia ki samla pule kiba pass bha ha NEHU LLB resulut 2023 kaba dang shu pynbna shen.

Mynta u snem ki la don 15 ngut kiba ialeh ia ka u 6th-semester LLB examination jong u snem 2020-23, ha kaba napdeng ki 15 ngut kiba iakhun, 7 ngut ki la wan ha ka kyrdan top ten, katba 12 ngut ki la wan ha ka kyrdan First Division.

U Wanbhalang Buam u la wan ha ka kyrdan kaba hakhmat eh ha ka result jong ka NEHU LLB kaba dang shu pynbna shen ha ka jylla.

Napdeng kiwei pat kiba wan shakhmat ki kynthup ia u Rapborlang Kharbihkhiew MCS, uba bat mynta kum u  Additional Deputy Commissioner jong ka Ri Bhoi District. U Kharbihkhiew u la wan ha ka kyrdan seventh position ha ka top ten list bad mynta u don ia ka jingangnud ban bteng ia ka Master of Laws (LLM). Katba u Hameshaniah Suiam uba dei u nongialehkai sports uba mihkhmat ia ka jylla ha ka jingialehkai Kickboxing u la wan ha ka kyrdan fifth position.

Ka nongmihkhmat kynthei ba nyngkong na ka thain Jaintia Hills, ka Kong Santa Mary Shylla kaba mihkhmat ia ka  Sutnga Saipung Constituency ka la ia don ryngkat lang ha kane ka sngi kum ka Kongsan nalor u Executive Member ka JHADC u Bah Phasmon Dkhar, u President ka Governing Body ka Khadar Daloi Law College, u Dr. PM Passah, President ka Society For the Study of Law (SFCL) R. Lamarr, Secretary ka SFSL JB Laloo nalor kiwei kiwei pat.

Ha ka jingkren ka Kong Santa Mary Shylla ka la pyrto ia kine ki samla pule kiba wan shakhmat kumjuh ia baroh kiba pass ia kane ka eksam. Ha ka juh ka por ka la pynpaw ka jingsngew bynniaw ha kaba iadei bad ka jingbym biang ki jingtei jong kane ka jaka pule bad kyntu ia ka governing body bad ia ka Society for the study of Law ba kin phah sha ka ia ka jingtyrwa khnang ba kan lah ban pynioh ia ka jingiarap pisa na ka bynta ban kyntiew ia kane ka kolej.