Pynkup burom ka KSU Narpuh 34 ngut ki khynnah pule da ka Maitshaphrang Academic Award

Syllad | The Rising MeghalayaNovember 15, 2020

Ka Khasi Students’ Union (KSU) Narpuh Circle kala pynkup burom da ka 9th Maitshaphrang Academy Award 2020 ia ki 34 ngut ki khynnah pule kiba la pass bha haka eksamin bapher bapher, kynthup iaka Vyonica Dkhar naka Shnong Thangskai kaba la wan haka kyrdan kaba hynriew jong ka thup Top-20 haka eksami SSLC. Ka Vyonica kadei ka khynnah kaba pule ha St. Margret’s HSS, Shillong.

Ia kane ka khusnam ka KSU Narpuh circle kala sam ha Lumshnong Community Hall haka sngi Saitjain.

U kongsan ha kane ka sngi u dei u Deputy Commissioner, East Jaintia Hills u Bah E Kharmalki, IAS bad iaka jingialang la pyniaid da u KS Suchiang President KSU Narpuh Circle uba la ïathuh baka jingthmu jong ka KSU ban sam ïa kine ki khusnam ka long ban pynshlur bad ai mynsiem ïaki khynnah bad samla pule ka thaiñ ba kin nangkiew ha kam pule puthi jong ki ba kin long ki myntoi ka imlang ka sahlang.

U Bah Kharmaliki haba kren ula ong ki khynnah pule lada ki trei shitom mynta kam don jingeh iaki ban pule haki kyrdan kiba halor namar ba ki ioh ka jingkyrshan bad ka jingiarap naka sorkar kumjuh na ki sengbhalang bad ki shnong.

“Ki khynnah bad samla pule ba kidei ban long adkar ha ka jingim ban lait na ki jingmlien kiba sniew kum ka jingkyrni ha ki jingdih pynbuaid ban jop haka jingim pule puthi,” la ong u Bah Kharmalki bad ula iaroh iaka KSU Narpuh kaba la jam sha u mawmer kaba 10 snem ka jingiaid lynti ka KSU Narpuh.

Kiwei de kiba la ai jingkren ki long u Bah Emlangki Lamare MDC ka thaiñ, u Ohibait Dkhar President KSU JHDU, u SS Ñiangti President KSU Khliehriat Circle, u S. Ryngkhlem President Synjuk Rangbah shnong EJH, u M. Ladong Waheh Shnong Lumshnong, u Ruben Nejiar Assistant Education Secretary KSU CEC Incharge KSU JHDU

Nalor ka jingpynkup burom ïaki samla pule ka thaiñ la ka pynkup burom ruh ïaki nongïalam ba nyngkong eh ka KSU Narpuh Circle kaba la seng ha u snem 2010 ba kynthup ïa u R. Molin Bamon President, u TL Gympad Vice President, u George Paswet Organising Secretary, u Shaphrang Pynkhlong Finance Secretary, u Risajop S Dhar Education Secretary, u Jorly S Dhar Assistant General Secretary (KSU Narpuh Circle).

La sam khusnam ruh sha ka skul Willington Jungai Memorial Secondary School Ratacherra, ka Chiehruphi Secondary School bad ka Holy Cross Higher Secondary School Umkiang kiba la wan shakhmat haka jingïakop thoh ‘Essay’ halor ka phang “Ka Jingstad Hapdeng ka Jingkyrduh”.