Pynkup burom ka KSU Wapung Unit ia kiba pass bha da ka 5th U Woh Tep Kyndait Academic Award

Syllad | The Rising MeghalayaJanuary 18, 2025

Ka Khasi Students’ Union (KSU) Wapung Unit ha ka 17 tarik kyllalyngkot 2025 kala pynlong iaka jingpynkup burom iaki khynnah skul bala pass bha haki eksam jong ki jong u snem 2024, kaba la tip kum ka 5th U Woh Tep Kyndait Academic Award 2024 ia kito ki khynnah haki kyrdan pule jong ki kata haka klas 10, klas 12 bad degree bad kiwei ki jait course kum ka dak ban pynshlur ban kyrkhu kyrdoh bad kitbok kitrwiang iaki haka liang ka pule puthi bad ha ka jingim jong ki ban kin nangkiew shaphrang.

Ki khynnah ba ioh ia kane ka khusnam ki kynthup ki khynnah skul na ka Shnong Wapung Shnong, Wapung Skur, Mookhep, Tuber Kmai Shnong, Tuber Shohshrieh bad Shohshrieh. Ha kajuh ka por ka KSU Wapung Unit ka la ioh ban pynkup burom iaki ar-ngut ki nonghikai bala ioh ia ka kyrdan PhD kita ki kynthup Dr. Heipor Uni Bang bad Dr. Tanbok Dkhar

Ia kane ka lympung  pynkup burom la pynlong ha ka Wearing Memorial DCLP school Wapung Skur bad la pyniaid da u President ka KSU NEHU  Unit da u Shibaitlang Rymbai.

U kongsan ha kane ka sngi u dei u Pynkmenlang Sanmiet u ba dei u Education secretary ka KSU CEC. Haba ai jingkren u la ong, “Ha ka jingim, ngi don la ki jong ki jingeh hynrei kaba kongsan ka long ka jingkut jingmut bad ka jing iaineh.”  U la ong ruh “Ki ar tylli ba ngim lah ban thied ha ka jingim ka dei ka jingnang jingstad bad ka jingkoit jingkhiah bad lada duh noh ia kine ka jaidbynriew kan ringswai.”

U Shaniahskhem Dkhar, Finance Secretary KSU East Jaintia hills District kum u symbud kongsan u la kyntu kynpham ia ki khynnah ba kin nang iai minot ha ki jingpule jong ki