Pynkup burom ka KSU West Jaintia Hills iaka samla Larisa Lamin kaba pass haka kyrdan ba nyngkong haka HSSLC

Syllad | The Rising MeghalayaMay 31, 2023

Ka Khasi Student Union (KSU) West Jaintia Hills District haka sngi ba Ar kala pynkup burom iaka samla Larisa Lamin kaba wan haka kyrdan kaba nyngkong eh ka Higher Secondary School Leaving Certificate (HSSLC) ha ka Arts Stream kaba na ka skul Adventist Higher Secondary School, Thadlaskein.

Ka jingpynkup burom iaka samla Larisa kala long haka hall jong ka skul haka jingiadonlang ka Principal, ki nonghikai, ki khynnah skul nalor ki nongialam bad dkhot kiba kynthup ia Leningrad Tariang general secretary KSU West Jaintia Hills District Unit, Conard Sana education secretary Jowai Circle, ka samla Ladaplin Haiong president girls’ wing War Jaintia Circle bad kiwei kiwei.

U Leningrad ula ong ba marsien pynbna iaka resol HSSLC Arts Stream, kum ka seng ki dap da ka jingkmen namar ba la bun snem ia kane ka kyrdan la bat da kiwei ki jaidbynriew bym dei Khasi. Ha kane ka kynti marsien iohi iaka kyrteng jong ka Larisa, kum ka seng ki kmen ba ka wan ha kane ka kyrdan bad kane ka pynpaw shai ba ki khynnah ka jaidbynriew kim duna lada treishitom haka jingim pule puthi.

Ula kyntu ia ki khynnah bad samla pule ba kin bud iaka nuksa jong ka Larisa ban jop haka jingim pule puthi namar lyngba ka jingstad lah ban saindur iaka lawei ba phyrnai ialade shimet bad iaka imlang ka sahlang.