Pynkup burom ka Kyrmen Foundation iaki lai ngut ki nongai snam sngewbha

Syllad | The Rising MeghalayaOctober 21, 2024

Ka Kyrmen Foundation haka jingiakynduh lang kaba ar ne ka 2nd Volunteers Meet 2024 kala pynkup burom iaki lai ngut ki Volunteer kiba trei na ka bynta ka bha ka miat jong ka imlang sahlang.

Kine ki lai ngut ki volunteer kidei u Ma Yoohoimi Khyriem uba la synniang snam la 40 sien, u samla Augustin Phawa uba la synniang snam 13 sien kumjuh ka Kong Janta Dkhar kawei na ki volunteer kaba trei shitrhem iaka kam.

Haka jingiaid lynti kaba 4 snem ban shakri iaka imlang sahlang, ka Kyrmen Foundation kala pyntip ba ka la dep ban pynlong 18 tylli ki Blood Donation Camp haki lai District ka East Jaintia, West Jaintia kumjuh ha East Khasi Hills District bad pynmih ruh 700 tam Unit ka snam.

Nalor kata, ka Kyrmen Foundation ka la dep ruh ban shah jied kum kawei na ki lai tylli ki seng treimon sngewbha ban mihkhmat ïa ka Jylla haka jingïalang jong ka National Voluntary World Blood Donation Day, kaba la pynlong ha Jaipur, Rajasthan.

Iaka jingiakynduh lang jong ki Volunteer la pynlong ha Heaven’s Cope, Syntu Ksiar haka jingdonlang u myntri ka sorkar Jylla u Ma Kyrmen Shylla, u Deputy CEM JHADC Ma Lasky Rymbai, ka Secretary Kyrmen Foundation ka Kong Simi Khongtiang nalor kiwei.

U Kyrmen Shylla haka jingkren ula ong kino kino ki briew kim lah ban shu mih ne paw pyrthei lada um don ki jingeh, hynrei bunsien kum ki briew ngi pyrshang ban jngai na ka jingeh.

Ula ai nuksa ruh ia u Ratan Tata uba shna iaki kali khnang ban pynsuk bad weng iaka jingeh na ka jingiaid kjat. Kumjuh ruh ka Kyrmen Foundation ka mih pyrthei ban iarap bad weng iaka jingeh jong ki nongshong shnong khamtam haka por ka khlam Covid-19.

U Ma Kyrmen ula kyntu iaki volunteer ban kiar na ka jingpyrshang ban ai snam ban ioh kamai pisa hapdeng ki nongpang bad ki nongai snam namar kane ka jingpyrshang ka long kaba sniew haduh katta katta.

Kine ki ar ngut ki nongai snam kila pynshlur iaki samla ban synniang snam namar ka long kaba bha, bad kam don jingktah hynrei ka pynim pat ïa kiba bun ki mynsiem briew. Kila kot wer ia baroh ban ai sngewbha ïala ka jong ka snam khlem jingtieng, namar ka jingai snam ym tang ba ka pynim, ka pynioh iaka met kaba khlain.

Ha kane ka jingiakynduh lang ka Kyrmen Foundation kala pynbna ruh iaka Kong Cornelia Dkhar kum ka President bathymmai jong ka Kyrmen Foundation.