Pynkup burom ka MeECL Friends United (MFU) ia u Phrangki Buam

Syllad | The Rising MeghalayaSeptember 30, 2020

Ka MeECL Friends United (MFU) ka kynhun ki nongialehkai phutbol ba shakri kum ki Engineers, ki officers bad ki Staff jong ka MeECl kila pynkup burom ia u Phrangki Buam shuwa ba un leit ban ia shim bynta noh bad ka klob thymmai jong u ka FC Goa.

Ia kane ka jingpynkup burom la pynlong haka sngi ba ar haka jingialang kaba lyngkot ha sor Shillong kaba la pyniaid da u Mangager ka MFU Bah Paia Synrem.

U Bah Paia haba kren ula iaroh ia une u samla uba don ka sap lehkai football bad ka jingoiasoh jong u bad ka FC Goa kala wanrah jingsngewsarong ia ka jylla baroh kawei..

La ioh ruh ka jingkren na u Captain ka MFU Bah Banrap Narry uba la ai mynsiem bad kitbok kitrwiang ia u Phrangki ba un nangtrei shitom khnang ba un nang ioh ka jingjop haka jingim ialehkai.

Kumban shu pynkynmaw ba u Phrangki Buam u dei uba na ka shnong Thangbuli, Amlarem West Jaintia Hills District bad u dei u khun jong ka Kong Childa Buam bad Bah Manmi Kassar.

Ha ki por ba u dang kham khynnah u la shah jied ban shah hikai ha ka Sport Authority of India ha Shillong. Ula ia lehkai arsnem na ka Royal Wahingdoh Sport FC bad lai snem na ka Shillong Lajong FC. U dei u samla ba dang 19 snem ka rta bad u dang don ka lawei kaba phyrnai lada u iaineh ha ki jingtrei shitom jong u.

U ne u samla un ialehkai na ka FC Goa haka jingpeit jong u head coach uba na ri Spain u Juan Ferrando bad u dei u coach u dei ruh u coach barim ka Barcelona Youth Team, Barcelona B.

“Ngi kyrmen skhem ba ka jingthied jong ka FC Goa ia une u Phrangki kan nang kyntiew ia ka sap lehkai jong u bad khlem pep un nangiai paw bad wanrah ka nama burom ialade bad iaka jylla,” la ong ki nongialam ka MFU bad sneng kraw ia une u samla ban don ka mynsiem ialehkai bad ban nym pynsep ei iaka sap kaba u don bad kitbok kitrwiang ba un ioh ka met ka phad kaba shait kaba khlain.

La ioh ruh ka jingrwai kyrpang na uwei na ki dkhot ka MFU u Bah Baladonbok Kharkamni.

U Phrangki Buam ula mih na ka Jylla mynta ka sngi na sor Shillong ban sdang iaka jingim ialehkai kaba thymmai jong u bad ka FC Goa, kaba la soi haduh lai snem ia une u samla.