Pynkup burom ka MFA ia ka Bonifilia Shullai ka thei ialehkai ba paw ka Jylla

Syllad | The Rising MeghalayaMarch 21, 2024

Ka Meghalaya Football Association haka 20 tarik Lber ka la pynlong ka jingpynkup burom ia ka samla ialehkai ba la paw mynta ka Bonifilia Shullai ha ka jingialang kaba la long ha Conference Room jong ka Shillong Sports Stadium, First Ground, Polo.

Ha kane ka prokram la ia don lang ruh u Bah Hamletson Dohling President ka MFA kum u Kongsan, u bah Cliff R Nongrum vice-president, bah D.L Nongbri Jt. Secretary, bah Freddy Kharpran bad ki bahaiing ha sem jong ka Bonifilia.

Haba kren kum u Kongsan, u Bah Hamlet u la pynpaw ka jingsngew sarong ba ha kum kane ka kynti kaba mynta ba ka jylla ka la lah lem ban sei ia ki thei ialehkai kiba kynsai kum ka Bonifilia kaba ym shuh tang ba la shu shah jied ban mihkhmat hynrei ban don bynta beit syndon ha ka First XI hapoh ka kynhun ialehkai jong ka ri.

Ka Bonifilia Shullai dang shen ka dang shu dep ban wan ban mihkhmat ia ka kynhun ki thei ialehkai U-16 jong ka India sha ka lympung jong ka SAFF.

Kane ka jingshah jied ka Bonifilia ka long da shisha kum ka jingai mynsiem lem ia kiwei pat ki thei samla ialehkai phutbol ka jylla, ba lada minot bad trei shitom bad don ka discipline ha ka jingim ka jingkhang ka long kaba la plie lypa ia ki ban ioh ban ialehkai na ka bynta ka ri.

U Bah Hamlet u ai khublei ruh ia ki kmie ki kpa jong ka Bonifilia kiba la shah sngewbha ia la ka jong ka khun ba kan don jngai na la iing na ka bynta ban nang pyntbit shuh shuh ha ka jingialehkai.

Ha kane ka sngi la ioh ruh ia ka jingkren na u bah D.L Nongbri Jt Secretary MFA, uba ai khublei kyrpang ia ka Lawmali Sports Club, kaba don ia ka kper sara (grassroot centre) ia ki khynnah rit  jong ka dong ban sain dur janai  ia ka sap ialehkai phutbol, kaba lyngba kane ka kper sara ka jong ka, la lah ban sei pat mynta ia ka thei ialehkai ba kynsai kum ka Bonifilia.

Ha kane ka sngi, ka MFA ka la pynkup da ka jain  thohrew stem bad ai ruh ia ka momento lem bad ka song pisa kaba khadsan hajar tyngka.