Pynkup burom ka NPP Sutnga-Saipung Block Committee ia u Dr WR Kharlukhi

Syllad | The Rising MeghalayaJuly 10, 2020

Ka National People’s Party (NPP) Sutnga-Saipung Block Committee, East Jaiñtia Hills District ryngkat bad ka Dorbar Shnong Sutnga kila pynkup burom ia u Dr WR Kharlukhi MP Rajya Sabha ka thymmai ka jylla.

Ia ka jingialang pynkup burom la pynlong ha Presbyterian Higher Secondary School Sutnga haka sngi Thohdieng haka jingialang kaba pyniaid da u ma TL Chyrmang Block President ka NPP.

Ha kane ka jingpynkup burom ia u MP Rajya Sabha la iadonlang naduh u Waheh Shnong Sutnga ma B. Sutnga, Kong A Bamon Seng Kynthei Sutnga, Dolloi Elaka Sutnga ma Erodit Sutnga, Tbn G Dkhar President Youth Wing EJHD, Ma Octomewot Lamin Nominated MDC JHADC uba long ruh u President ka NPP West Jaintia Hills District, Dr JW. Dkhar President NPP East Jaintia Hills District, ma Nidamon Chullet Working President NPP, ma H. Bamon Ex MLA, ma Arbor Hima Darnei MDC JHADC, ma Seiborlang Shadap MDC JHADC, bad kiwei kiwei ki dkhot jong ka NPP Sutnga Saipung Block.

U Dr Kharlukhi haba kren u la ong ba hashwa ba un leit sha nongbah Delhi u kwah ban ia kynduh ia ki nongtrei jong ka party bad ki briew jong kane ka shnong, u la ong ruh ba wat lada ha kane ka Constituency ka NPP kam shem poi sha ka thong, hynrei lada shim baroh kawei ka rilum Jaintia ka party NPP ka dei kaba buh eh ki nongkyrshan.

Ha ka jingiadei bad ka jingkiew jong ka party u Dr Kharlukhi u la ong ba dei tang ka jingtrei hok kaba lah ban pynkiew ia ka party namar U Blei ruh u iarap ia kino kino kiba trei bad kamai hok, hynrei lada ngim trei hok ka party kam poi sha no shano ruh. Ha ka jingiadei bad ki jingiarap sha ka thaiñ Sutnga u la ong ba kumba long mynta ka sorkar India ka la pynsangeh ia ka jingai ia ki scheme sha ki MP na kadaw ka khlam COVID, hynrei katba lah ka bor jong u un iarap ia ki jingdon kam jong kane ka shnong.