Pynkup burom ka President ka Ri India ia I Kong Silbi Passah da ka khusnam Padma Shri

Syllad | The Rising MeghalayaMay 10, 2024

Ka President ka Ri India ka Droupadi Murmu ka la pynkup burom da ka khusnam Padma Shri ia I Kong Silbi Passah halor ka jingnoh synniang ka jong i ha ka ban pynneh pynsah bad kyntiew ha ka liang ka put ka tem, ka rwai bad ka shad tynrai jong u khun Khasi Khara ha ka jingialang kaba la long ha Rashtrapati Bhawan, New Delhi ha ka 9 tarik mynta u bnai.

I Kong Silbi ha u snem ba la dep ruh ila ioh pdiang ia ka khusnam Sangeet Natak Akademi Award na ka bynta u snem 2021 na ka President Droupadi Murmu.  

I Kong Silbi Passah i la noh synniang ym tang ha ka liang ka put ka tem bad ka shad tynrai hynrei i dei ruh i nonghikai skul ba la shongthait iba la trei shitom na ka bynta ban kyntiew ia ka ktien Hindi ha ka Jylla, bad i la iashim bynta ruh ha ki prokram Radio shibynta ban kyntiew ia ka ktien Hindi.

I la long ruh i resource person ka Sarva Shiksha Abhiyan (SSA) bad DERT (Directorate of Educational Research & Training) ha kaba iadei bad ka jingai jinghikai ha ka liang ka put ka tem, ka rwai ka siaw, ki kam ialeh drama, bad ka liang ka put ka tem tynrai.

I Kong Silbi Passah iba don ia ka jingangnud bad ka jingthrang ban kyntiew ia ka put ka tem bad ka kolshor ha ka jylla lyngba ka Tnat Arts and Culure ha ryngkat ka jingiatreilang bad ka (NEZCC) North East Zone Cultural Centre, i la ioh lad ban iashim bynta ha ki tamasa kiba iadei bad ka put ka tem ia kiba la pynlong da ki zone bapher bapher jong ka ri, kata kum ka South Zone Cultural Centre, South West Zone Cultural Central, West Zone nalor kiwei pat.

Kumta ruh lyngba kine ki rynsan i la pyrshang ia kaba bha tam ban ioh pynpaw ia ka jingriewspah jong ka Meghalaya ha ka liang ka kolshor.

Shibynta jong ka jingithuh ia ka jingtrei shitom bad ka jingshakri hok ia ka kam i la ioh pdiang ia kiba bun ki khusnam ha ki liang bapher bapher. I la ioh pdiang ia ka khusnam District Certificate of Honour na ka sorkar Jylla ha u snem 2001, Seng Khasi,  State award (2005); Seng Khasi, Seng Kmie Honorary Award (2008); People’s Choice Award NETV (2005); National Award for teachers (2006); Jeebon Roy Award (2008); Khasi Jaintia Welfare Award (2009); International Gold Star Award (Bangkok 2010); Seng Samla Seng Kmie Honorary Award (2011); Lady of Hope (Cape Town South Africa) (2012); U Tirot Sing Award for Art and Literature (Meghalaya 2014); Youth Affair Award (2019); 4th Northeast Unsung Heroes red carpet social award (2021) bad ka Sangeet Natak Academic Award (2021).

Na ka liang u Myntri Rangbah ka jylla u Conrad Sangma lyngba ka rynsan social media X ula ai khublei kyrpang ia i Kong Passah halor kane ka jingioh pdiang ia katei ka khusnam kaba pyni ruh ba ka jylla Meghalaya ka dei kaba riewspah ha ka liang ka tem put ha ki jingshad bad rwai tynrai.