Pynkup burom ka President ka Ri India ia u heprit na SWKH ba pyllait im ia 4 ngut ki khynnah

Syllad | The Rising MeghalayaDecember 27, 2024

Uwei u heprit uba dang 14 snem rta uba kyrteng u Kisen Wanniang uba dei na ka shnong Mawlangwir, South West Khasi Hills u la ioh pdiang ia ka khusnam Pradhan Mantri Rashtriya Bal Puraskar na ka President ka Ri India ka Droupadi Murmu namar ka kam shlur kaba u la leh khlem da khein ia la ka jong ka jingim.

Une u heprit u la pynpaw ia ka jingshlur ka jong u da kaba pyllait im haduh sawngut ki khynnah rit kiba dang ha ka rta 9 haduh 12 snem na ka jingngam jyllop hapoh ka wah Maweitsar kaba don hapoh ka shnong Mawlangwir, SWKH, kata ha ka por ba jur slap.

U Kisen uba dei u khun jong ka riewkynthei na kane hi ka shnong u dang saitjain ha kane ka wah hadien ba u la iohsngew kynsan ia ka jinglyniar bad pan jingiarap jong ki khynnah.

Kumta ruh khlem da pynslem bad khlem da pyrkhat ia la ka jong ka jingim une u heprit u la mareh bran bran bad ryngkoh shapoh um bad ioh pyllait im ia kine ki khynnah iwei hadien iwei pat.

Ha kane ka jingialang pynkup burom kaba la long ha ka 26 tarik Nohprah ha Rashtrapati Bhavan, New Delhi ki la don baroh 17 ngut ki khynnah kiba la ioh pdiang ia ki khusnam ha la ki jong ki kyrdan ia kiba la jied na ki 14 tylli ki Jylla bad Union Territories.

Ha ka jingkren ka President ka la ai khublei kyrpang ia baroh ki nongioh khusnam bad pynpaw ruh ba ka ri baroh kawei bad ka imlang ka sahlang ka sngew sarong na ka bynta jong ki.Ka la pynpaw ruh sha kine ki khynnah ba ki la leh ia ka kam bah kaba khraw bad ba phylla bad kaba long da shisha ka nuksa ia kiwei pat ki para khynnah jong ka ri.