Pynkup burom ka Rotary Club ïaki ar ngut ki nongrwai ka sor Jowai

Syllad | The Rising MeghalayaJanuary 19, 2020

JOWAI: Ka Rotary Club Jowai kala pynkup burom ïaki ar ngut ki samla kiba don ka sap ka phong ban rwai bad ka tem ka put kiba na ka sor Jowai haka jingplie pyrda ïaka Jubili Rupa jong ka Rotary Club Jowai, kaba la wan ban plie da u MP ka Shillong u ma Vincent H Pala ha ïing dorbar jong ka Loomsooiung Newhill haka sngi Saitjaiñ.

Kine ki ar ngut ki samla kiba shah pynkup burom haka Rotary Club, Jowai da ka khusnam ‘Vocational Award’ ka dei ka samla Morealda Paswet kaba na Pohhali, Dulong, Jowai bad u Deiwitawan Synnah uba na Loomiongkjam, Jowai.

Ka Morealda Paswet ka dei ka samla kaba la pyndep ïaka Master Degree (Music) na Martin Luther Christian University. Ka la shimbynta ha ki rynsan bapher bapher bad kala rwai ruh ha kawei ka phlim Khasi. Ka angnud ban kyntiew ïaka tem ka put bad ka rwai ka siew da kaba seng ïala ka jong ka shlem ai jinghikai ban pynneh pynsah ïaki jingrwai tynrai.

U Deiwitawan Synnah ula sdang ïaka kam rwai naduh ba dang khynnah bad ula thaw ïaki sur jingrwai bad kumjuh ula rwai hi bad ula don bynta ha kaban pynmih paidbah ïaki sur jingrwai ha ki katto katne ki album. U don ka jingthmu ban buh ïaka ka jong ka recording studio.

U Ma Vincent Pala ula pynkup burom ïa kine ki ar ngut ki samla bad ula plie paidbah ruh ïaka jingrakhe dap 25 snem ka Rotary Club Jowai (1995-2020).

U Ma Pala haba kren kum u kongsan, ula ïaroh ïaka Rotary Club Jowai kaba la don bynta ha kiba bun ki kam ban kyntiew ïaka imlang sahlang ka Rilum Jaiñtia bad ban pynithuh ruh ïaki briew naduh ki samla haduh ki rangbah kiba jop haka jingim jong ki haki kam bapher bapher.

“Nga la ïoh shibun ki jinghikai na Rotary Club, kaba hikai ban ïarap ïaki para briew ban kyntiew ïaka imlang ka sahlang. Ka Rotary Club ka pynithuh bad wanrah ka jingiajan bad jingiadei jong ki nongshong shnong na kawei ka ri sha kawei ka ri,” la ong u Ma Pala bad bynrap ba kane ka club kala iarap bha ïa u haduh ban phah skul khun bad kiwei kiwei ki kam.

Ïa ka jingïalang haka sngi plie pyrda ïaka jubili rupa ka Rotary Club Jowai la pyniaid da u Rtn JM. Pohsngap (PHF) President Rotary Club Jowai, haka jingiadonlang ki dkhot ka Rotary Shillong, Jowai bad ki Rotaractor ne ki seng samla ka Rotary Club.

Ïaka report jong ka jingiaid lynti jong ka Rotary Club Jowai la pynsngew da ka Rtn EF Gatphoh MPHF. Kala iathuh ruh iaki projek kiba la trei ka Rotary Club, Jowai kaba kynthup ïaka jingtei ïaka dam ha Treiongriang ka bynta jong ka Wah Myntdu da ka jingïatreilang bad ka Jaintia Fishing and Environment Protection Association (JFEPA). Nalor kata kala synniang ruh ïaka kali kit nongpang bad kali kit metiap da ka jingkyrshan u Dr. RC Laloo kiba la aiti sha ka tnad Pulit bad ka KJP Assembly Hospital Jowai. Kala pynlong ha rukom ki prokram ban hikai ïaki paidbah ban nang ban thoh ban tar bad pynshlur ïaki nongshong shnong ban beh sha ka jingnang jingstad bad ban ïakhun ban iada iaka mariang.