Pynkup burom ka Rotary Club Jowai ia ki Pulit West Jaintia Hills & ka Dorbar shnong Mihmyntdu

Syllad | The Rising MeghalayaAugust 22, 2020

Kum shibynta ban ai mynsiem shuh shuh ia ki briew kiba mih shakhmat ban ai jingshakri ha ka ban iada na ka jingpur jong ka Khlam COVID-19 hapoh ka District West Jaintia Hills, ka Rotary Club Jowai haka 21 tarik Nailar da ka jingsngewkhia ka la shim ka sien jam ban pynkup burom ia ki Pulit jong ka West Jaintia Hills District bad iaka dorbar shnong jong ka Mihmyntdu.

Ia ki Pulit ka District la pynkup burom ha Conference Hall jong ka ophis u Superintendent of Police bad iaka Mihmyntdu la pynlong ka iing dorbar ka Mookynphad, Mihmyntdu.

Iaka jingialang pynkup burom ha conference hall jong ka ophis u SP la pyniaid da u Rtn. S.K.Lato, MPHF President Rotary Club Jowai ha ryngkat ka jingiadonlang u Rtn. Dr Kameswar Singh Elangbam, Assistant Governor Zone X RI District 3240.

La iadonlang Superintendent of  Police West Jaintia Hills BD Marak, Additional Superintendent of Police West Jaintia Hills u B Chetri, ki dkhot ka Rotary Club Jowai bad  Shillong bad kiwei ki  Officer ka Police Department.

U Rtn. Dr. Kameswar Singh Elangbam haba kren kum u kongsan u la iaroh iaki Pulit kiba la trei shitom bad shimkhia shisha ban ai ka jingshakri ia ka imlang sahlang ha baroh ki liang khamtam ha kum Kane ka por ka saw ka sain ka jylla ba ka pyrthei shityllup ka don hapdeng ka jingialeh ban ban pyndkut iaka kynjri jingpur ka khlam COVID-19.

U la ong ruh ba dei hok iaphi baphin ia kane ka burom namar ka jinglenlade jongphi ban trei bad pyndep iala ka kamram khlem da shongthait.

U BD Marak, Superintendent of Police West Jaintia Hills haba kren u pynpaw ka jingsngew nguh ia ka Rotary Club Jowai kumjuh ia ki dkhot jong ka kiba ithuh ia ka jingtreikam jong ki pulit bad kane ka long ka burom ba khraw kaba ki ioh khlem poi pyrkhat.

Kum ban ai mynsien shuh shuh briew kiba trei haka tnad Pulit ba don hapoh ka District u la Ong, “Kynmaw ha kum kane ka por long kiba la pynkhreh shwa ialade khnang baphin lah ban ai pat ka jing skhakri ia kiwei bad long ruh kiba tip bad sngewthuh ban pyntreikam ia ka kyntien SMS kaba mut Sanitized your hand – Use Mask – Maintain Social Distancing.”

Ki briew ka Police Department kiba la shah pynkup burom ki kynthup ia ka Albanisha War, u Firstway  Shullai, u Rabindra Thakur jong ka Police Medical Team, u Inspector Deep Khatri, u Sayendra Hajong, u Meker Suting, u Lamiki Suchiang, u Jaseng Sangma, u Debingsen M Sangma, ka Sufficient Shylla bad u Rijuski Rabon Jong ka Jowai Police Traffic Team.

Ka Rotary Club kala ai ruh kawei ka syrnod jingiaroh sha u SP bad baroh ki officer kiba trei shitrhem ban iakhun pyrshah iaka khlam COVID-19.

Hadien kane ka jingialang ka Rotary Club kala pynkup burom iaka dorbar shnong Mihmyntdu. Ka Rotary kala aiti iaka syrnod jingiaraoh ha u waheh shnong ka Mihmyntdu u ma Abul Phawa ha ka jingiadonlang kiwei kiwei ki dkhot jong ka shnong Mihmyntdu.

Ka Dorbar shnong Mihmyntdu ka don haduh 5 tylli ki quarantine shnong bad haduh 173 ngut ki briew ba kynthup ki khun ka shnong bad ki ba nabar kila ioh myntoi na kine ki iing ban shong ban sah ban pyndep iaka kyndon bala bthah ka sorkar ban iada na ka khlam COVID-19.

U Ma Abul Phawa, Waheh Shnong ula pynpaw ka jingsngewnguh iaka Roatary kaba ithuh iaka jingtreikam jong ka shnong. Ula ong ba baroh ki jingpynkhreh ka shnong ki dei da ka jingiatreilang ki dkhot shnong bad ka sorkar.