Pynkup burom ka Seiñ Kur Dkhar iaki samla pule bad pynskhem iaka Pamrakmai Unit

Syllad | The Rising MeghalayaJanuary 30, 2021

Ka Seiñ Kur Dkhar Jaintia Hills, Wapung Circle ka la pynkup burom ïaki 15 ngut ki samla kiba la pass bha haki kyrdan jingpule bapher bapher ïa kaba la tip kum ka “Excellence Award 2020 Ceremony”.

Ïaka jingïalang pynkup burom la pynlong ha madan Catholic phutbol Pamrakmai, East Jaintia Hills haka jingïadonlang ki dkhot nongïalam jong ka Seiñ Dkhar na East Jaintia bad West Jaintia Hills District mynta ka sngi Saitjain.

Napdeng ki 15 ngut kiba la shah pynkup burom, u samla Ajay Dkhar u khun jong ka Kong Empor Dkhar ba shong basah haka Shnong Mookhep udei uwei uba la rung kyrteng haka thup Top-10 (6th Position) jong ka resol HSSLC Examination (Commerce) jong ka MBOSE.

Hashwa ka jingpynkup burom ka la don ka jingïalang ba la pynïaid da u President ka Seiñ Kur Dkhar Wapung Unit u Shaniahskhem Dkhar bad ïaka kaiphod (report) jong Kur la pynsngew da u Kyrshan Dkhar bad la ïoh ïaki jingkren lyngkot naki nongïalam na West Jaintia ba kynthup ïa u Hamjhan Dkhar, u Dawan Dkhar, u Teras Dkhar President ka Kur na East Jaintia bad kiwei kiwei.

Baroh ki nongkren ki la ai ka jingïaroh ïa kine ki samla kiba la wanrah ka nam ka burom ïalade shimet, ka ïing ka sem bad ka kur Dkhar bad ki la ai ka jingkitbok kitrwiang bad ka jingkyrkhu kyrdoh ba kin nangkiew shaphrang haki jingpule puthi jong ki.

Ha kane kajuh ka sngi ka Seiñ Kur Dkhar ka la pynskhem ïaka Pamrakmai Unit bad pynbam smai ïaki dkhot nongkitkam naka bynta ka samoi treikam jong u snem 2021-2024 bad ïaka jingpynbmai smai la shimti da u Harwis C Dkhar.

U Hamjhan Dkhar haka jingkren ula ïathuh ba ïaka Kur Dkhar ha rilum Jaintia la seng ha u snem 1999 halor ka nongrim ban wanrah ka jingithuh ithaw iwei ïa iwei, ka jingïeid, ka jingïatylli bad ban wanrah ka jingsngew ïajan na kawei ka Shnong sha kawei ka Shnong bad ruh ban ïakit ïabah lang haka khia ka shon bad kiwei ki jingdonkam jong ka Kur. Ila ïathuh kumba long haduh mynta la thaw haduh 16 tylli ki Unit bad Circle.

U Dawan Dkhar ula ong ka jingthaw ïaki Unit ka long ka kabu ksiar ïaki longïing jong kito ki Kur ki bym don ïaki Kñi ki rangbah ki ban kit ïaka khia ka shon hynrei lyngba ka jingdon jong ki Unit ka wanrah ka jingshngaiñ ïaka longïing jong ki.

U Harwis C Dkhar ula kyntu ïaki dkhot nongkitkam jong ka Pamrakmai Unit ba kin bud ryntih ïaki kyndon treikam jong ka kur, kumjuh ban ri ïaka burom jong ka kur, ban im bha im miat hapoh Shnong poh thaw, haka niam ka rukom, ka imlang sahlang, ka synshar khadar bad ban kamai ïaka hok longbriew man briew khnang ban roi parum pareh na kawei ka pateng sha kawei ka pateng.

U kongsan u Ohibait Dkhar ula pyllait paidbah ïaka riti treikam jong ka Seiñ kur Dkhar bad la pynphuh pynphieng ïa kane ka sngi da ki jingrwai ieit Kur bad jingshad tynrai da ki khynnah, ki samla bad longkmie jong ka Kur Dkhar.

Nalor u Ajay Dkhar kiwei pat ki samla jong ka Kur Dkhar kiba la shah pynkup burom ki long u Pynshaikupar, ka Ibakordor, u Livingstone, u Ha-O, ka Ruphina Santa, u Wametre, ka Ribisonia, u Seibor, u Tobias, u Me-U-Ïoo, ka Sonysanki, ka Soowaka, bad ka Suzan.

Ïaka jingïalang pynkup burom la pynkut da ki kyntien ai khublei na ka Kong Ronika Dkhar na ka Shnong Pamrakmai.