Pynkup burom ka Seng Kynthei Seng Khasi Kmie ia ki samla ba pass bha, kynthup ia I kong Sweetymon Rynjah, Silbi Passah

Syllad | The Rising MeghalayaOctober 25, 2023

Ka Seng Kynthei jong ka Seng Khasi Kmie ha ka 23 tarik mynta u bnai ka la pynlong ia ka jingialang  pynkup burom ia la ki khun samla kiba pass bha ha ki eksamin bapher bapher jong une u snem.

Ha kane ka jingialang ba la pynlong ha Hall jong ka Seng Khasi Kmie, Mawkhar Shillong, ki la don haduh 11 ngut ki samla kynthei bad shynrang ba la ioh ia kane ka khusnam. Nalor kata ka Seng Kynthei ka la pynkup burom ruh ia ki arngut ki longkmie katta kum ia I kong Sweetymon Rynjah bad kumjuh ia I kong Silbi Passah, halor ka nongrim u synniang u bynhei uba ki la noh synniang sha u sup u thiar jong ka thoh ka pule, ka rwai ka siaw, ka put ka tem, kiba long da shisha ki spah bah ba kordor ym tang ia kane ka pateng kaba mynta hynrei wat ia ki longdien bad ia ki pateng kiban dang iai wan.

Ha kane ka jingialang la ia don lang ruh I kong  Baiantimon Blah (MCS) kum I Kongsan ha ryngkat ka jingsakhi lang a u Acting President bad General secretary ka Seng Khasi Kmie u Rgh O. Pyngrope bad Rgh Hainess Marbaniang, ki dkhot ka Jylli Pyrkhat Kam Seng Khasi Kmie, ki dkhot jong ka Seng Kynthei, ki kmie ki kpa jong ki khynnah ba la ioh ia ka khusnam bad kiwei kiwei.

Haba kren kum ka kongsan I kong Baiantimon Blah  I kyntu kynpham ia ki samla ba la pynkup burom ban ba kane kam dei kaba kut ha ka jingim ka jong ki, hynrei ba kin trei shitom shuh shuh na ka bynta ban lah  ban nang iai kyntiew ia ka nam bad ka burom ia ka iing ka sem bad ia ka Seng hi kumjuh.

I la ong ruh ba I lap bad shem ba don ruh ki khynnah ba hapdeng ka lynti jong ka jingpule ka jong ki, ki duh noh ia ka jingkyrmen namar ba kim ioh ia  katta ka jingialam lynti ne ka guidance, hynrei I sngewkmen pat ban pynpaw ba ha kane ka jingialang I la ioh jingtip ba ka kynhun jong ka Ka Tbian Ki Sur Hara, kaba dei kawei pat ka shlem ai jinghikai jong ka Seng Khasi Kmie, mynta ka la shim ha ka ia katta ka lyngkor ba kan ai ia ka jinghikai katno tam lei lei ban hikai na ka bynta da kumno ban nang ban kren ha ki rynsan paidbah, da kumta I kyrmen ba kine ki jinghikai kan long kaba seisoh.

Nalor kata I pynkynmaw ia ki samla ba la pynkup burom da kaba ong ba teng teng ki ju klet noh ia ki jingtrei shitom jong ki briew ba kyrshan ia ki,  pynban na ka liang ka jong I, I sngew ba in ai khblei ia ki kmie ki kpa ki hynmen ki para, ki meisan meinah, ki kha ki man, ki paralok parajor kiba iasnoh kti ban iarap ia kine ki khun samla ban kyntiew ia ki ha ka jingiaid lynti ka jong ki.

Haba phai pat sha ka bynta ka jingpuynkup burom ia I kong Sweetymon Rynjah bad Kong Silbi Passah, ia kane ka kam la pyndep da u Acting President u Rgh O. Pyngrope lem bad u Rgh P.D Nongrum, dkhot jong ka JPK.

Haba ai jingkren hadien ka jingpynkup burom, na ka liang I kong Sweetymon Rynjah I la ai ia ki kyntien kyrkhu kyrdoh ba ka Seng Khasi kan nang phuh nang kyrsei ha ki soh ki syntiew ki bym thoh pyut bad bym pei. I kyntu ruh ba donkam ban kiar na ki jingleh  ki jingkam ki ban kyrtep  ha ka longryngieng longbriew,  nalor katta I ban jur ia ka jingdonakm jong ka iasneng ka iakraw,  ym ia ka rhah ka rhing,  ka bishni ka pihuin, ka kynnoh ka kynthoh,  hynrei ban pynkiew ia ki jinglong kiba khuid.

Katba na ka liang I kong Silbi Passah I pynpaw ba I dap da ka mynsiem kaba sngew sarong ba ka Seng Kynthei Seng Khasi Kmie ba ka la ai ha I ia kane ka burom kaba long ruh ka sien kaba lai kaba I la ioh ban kiew bad ban pdiang burom na kane ka iing kaba I da ieit bad don ka jingkyrmen ba haba I leit shano shano  ba im klet ba don la ka jong.