Pynkup burom ka Shillong Referee Society ïaka Riiohlang Dhar, ka ban pyniaid sa iaka jingiakhun I- League

Syllad | The Rising MeghalayaDecember 21, 2020

Ka Shillong Referee Society (SRS), kaba pyniaid ia ki lympung ialehkai football jong ka Shillong Sports Association (SSA) ha ka sngi Saitjain ka taiew ba la dep ki la pynlong ia ka jingialang barit ban pynkup burom ia ka kong Riiohlang Dhar, hadien ba ka la lah biang sa shisien ba kan ioh ia ka Fifa Batch u snem 2020-21.

Kane ka dei ka sien kaba saw haka jingim ka Riiohlang ba kan ioh ia kane ka batch, ka sien ba nyngkong ka dei ha u snem 2018.

Ka jinglah ban ioh biang ka Riiohlang ia ka fifa batch ha ka sien kaba saw, ka la wanrah ia ka mynsiem kaba sngewkmen bad ka long artad ka burom kaba khraw naka bynta baroh ki referee bad ka jingai mynsiem ia kiwei pat ki referee ba kin shim bad bud ia kine ki nuksa jong ka Ri-Iohlang.

U kongsan  ba la don lang ha kane ka sngi dei u Rgh Dipshon.L. Nongbri Asst Secretary SSA bad u Senior Advicer jong kane ka synjuk ki referee.

Haba kren kum u kongsan, u bah Dip u la iathuh sa ia kawei pat ka khubor kaba sngewtynnad shaphang ka Riiohlang, kata hadien ba u la ioh ban pule ia kawei ka kot khubor kaba la pynpaw ba naka liang ka Riiohlang ka la rung lem ka kyrteng ka jong ka sha ka thup jong ki referee ka India ban pyniaid ia ka lympung ialehkai jong ka I-League mynta ka samoi.

Haba iadei bad ka jingpynkup burom daka Shillong Referee Society, u bah Dip, u la pyrto ia kane ka kynhun  da kaba u niew bad shim ba ka long kum ka jingai mynsiem ia kiwei pat ki para referee ym tang ba kin sahkut hala ka dong ka shnong hynrei ba kin ialeh katba lah ban kynjoh lem ha ka jingim ban ioh ban bat ia kata ka nam kum ki Fifa Referee.

Ia ka jingialang baroh kawei la pyniaid ia ka da u Iakmenlang Wankhar, la ioh ruh ia ka jingkren na u adviser ka synjuk bah Ricky Marshall Synnah bad la ioh ruh ia ka jingkren na u President ka synjuk u bah Jeffrey Shabong.

Hadien kane ka jingialang, ka synjuk ka la aiti ha ka Ri-iohlang ba kan ot ia u cake kum ka dak jong ka jinglehkmen advance Christmas.