Pynkup burom ka shnong Byndihati ia u Halen Nongtdu u ban mih khmat iaka ri India haka AFC U-16

Syllad | The Rising MeghalayaOctober 11, 2020

Ka shnong Byndihati haka sngi Saitjain kala pynkup burom ia u Halen Nongtdu, uba la ioh ban mihkhmat bad deng iaka jersey jong ka Ri India ban ialehkai haka lympung ialehkai AFC champions league haka kyrdan U-16 ka ban long ha Bahrain mynta u snem.

“Kan long ka sngi ban sah kynmaw bad sengew haka history jong ka shnong Byndihati, East Jaintia Hills ban ioh pynkup burom ia u samla Halen Nongtdu, u ban deng iaka jersey jong ka ri India ban mihkhmat Asian Champions League kaba dei kawei na ka lympung ialehkai baheh haka Asia,” la ong u ma Kyrmen Shylla,” Myntri Sorkar ka Jylla haba kren haka jingialang pynkup burom kaba pynlong da ka bor shnong Byndihati haka sngi Saitjain.

U Ma Kyrmen Shylla, uba long ruh u MLA ka Khliehriat, ula ong kum u MLA ka thaiñ “Nga sngewsarong ba don kum une u samla ba mih na kane ka shnong bad nga kitbok kitrwiang ia u Halen Nongtdu ba un lah shisha ban ialehkai bha bad ban wanrah ka nam ka burom ym tang iaka ri, hynrei iaka jylla ka shnong bad ka iing ka sem jong u baroh kawei.”

Ula iaroh iaki ïaki kmie ki kpa bad kiba haiing jong u Halen kiba la ïohi jngai bad pynshlur ia u Halen ban ioh pyndonkam hok iaka sap kaba u don.

“Ka jingshah jied u Halen kum u nongialehkai ka ri, un long kum u nongrah khubor iaka shnong Byndihati ban pynithuh iaka shaka pyrthei kaba dei ka jingsarong iaka shnnong Byndihati bad ka District bad ka Jylla hi baroh kawei,” la ong u ma Kyrmen bad ban jur ia u Halen ban kiar na ka jingsniew ka imlang ka sahlang bad ri kyndong iaka akor ka burom ban jop haka jingim.

Ka Shnong Byndihati, East Jaintia Hills District ka la pynkup burom ïa u Halen Nongtdu u ban mihkhmat ïaka kynhun ïalehkai ka ri India ban leit iashim bynta haka AFC U-16 Championship ka ban long ha Bahrain ha u Naiwieng mynta ka snem.

U Halen Nongtdu 16 snem rta udei u khun jong ka Kong Thilda Nongtdu bad Bah Kynsai Dkhar ba shong basah haka Shnong Byndihati.

Ïaka jingïalang pynkup burom la pynïaid da u Waheh Shnong u Bah Hambertus Nongtdu uba dei u Mama trai jong u Halen uba la pynshlur bad ai mynsiem ban ialehkai football.

“Kane jingpynkup burom ka long kum ka jingai mynsiem ïa u Halen ba un ïalehkai bha na ka bynta ka ri India ha katei ka lympung ïalehkai ha kajuh ka por ka long ruh ka jingpynshlur ïa kiwei pat ki khynnah kiba don ïaka sap ïalehkai phutbol bad ruh ïa kiwei pat ki jingïalehkai ba kin long kiba trei shitom haka kam ïalehkai”, ong u Waheh Shnong Bah Hambertus Nongtdu.

Kiwei pat kiba la ai jingkren ki kynthup ïaka Kong Thiangmon Shylla, Seril Suja, Felix Siangshai bad kiwei kiwei kiba la pynpaw ka jingsngew sarong ïaki kmie ki kpa, ka ïing ka sem bad ïaka shnong Byndihati ba ki la ïoh ïa u khun samla uba la wanrah nam rah burom ïaka shnong ka thaw bad ïaka District kumjuh ka Jylla.

Kumban shuh pynkynmaw u Halen Nongtdu naduh ka rta kaba dang 6 snem rta u sngewtynnad ïaka kam ialehkai phutbol. Hadien ba ula ïoh ka jingkyrshan na ki Kmie ki Kpa ula leit shah pyntbit haka shlem ai jinghikai ka DSK Shivajan Football Academy kaba don ha sorbah Pune.

Ioh mihkhmat u khynnah na Rilum Jaintia iaka India sha ka U-16 AFC Championship

Hangne u Halen ula pyndep ïaka jingpyrshang trial ba la pynlong da ka All India Football Federation bad mar sien dep ïaka jingpyrshang kaba ar taiew ula shah jied ban don bynta ha ka kynhun ialehkai AFC U-16 jong ka ri India.

U Halen haba kren ha kane ka jingialang pynkup burom ym shym la kren bunktien hynrei ula mynsiem ia ki paralok ialehkai football baroh kum juh ki kynthei da kaba ong “Ym dei tang ki shynrang ba nang ialehkai, hynrei ki kynthei ruh. U Blei ula ai ia ngi la la ka jong ka sap pyndonkam hok bad trei shitom ban poi sha ka thong.”

Ioh mihkhmat u Emboklang iaka India haka U-16 AFC Championship

Nalor u Halen Nongtdu, ki don ruh sa arngut ki rangïalehkai na kane ka Jylla ki ban leit mihkhmat lang sha katei ka lympung kiba kynthup ïa u Emboklang Nongkhlaw na ka Shnong Sohryngkham, East Khasi Hills District bad u Lionel Daryl Rymmei na Bhoirymbong.