Pynkup burom ka skul Lumshken Step-Up UPS iaki ar ngut kiba pass bha napoh shnong Lumshken

Syllad | The Rising MeghalayaJune 10, 2023

Ki bor pynïaid jong ka Lumshken Step-Up Upper Primary School, Lumshken East Jaintia Hills haka sngi Thohdieng kila pynkup burom ïaki arngut ki samla pule kiba la pass bha haki jingpule puthi jong ki napoh ka shnong Lumshken.

Kine ki arngut kiba la shah pynkup burom kidei u Aphiew Bareh uba la pass ïaka BSc (Physic) ha u snem 2022 ha Kiang Nangbah Government College, Jowai bad u Epherme Dkhar uba la wan haka kyrdan 1st Division ryngkat saw tylli ki distinction haka resol SSLC kaba dang shu dep pynbna shen da ka MBOSE. U Epherme pule hala shnong tad haduh klas VII bad iaka secondary ula pule ha Unitarian Hr. Secondary, Puriang.

Ïaka jingïalang pynkup burom la pynïaid da u Amon Dkhar bad la ïoh ka jingkren na u Waheh shnong Lumshken u Krin Dkhar, ka Headteacher ka Kong Balarisha Kharsati haka jingdonlang ki nonghikai, ki khynnah skul ka Govt. LP School Lumshken, ka Presbyterian SSA LP School Lumshken bad ki kmie ki kpa.

Baroh ki nongkren kynthup kila pynpaw ka jingkmen ïa kine ki arngut ki samla kiba la wanrah burom ïaka shnong bad ka dei ka sien ba nyngkong eh ban mih ki khynnah ne samla shnong Lumshken ba kin pass bha haka eksamin matrik bad BSc.

Kila ong ruh kane ka jingpynkup burom ka long kum shi bynta ban pynshlur ïaki khun jong ka shnong ha kaba ïadei bad ka pule ka puthi jong ki khnang ba kiwei ki khynnah ki ban sa leh ïaki exam jong ki nangne shakhmat ba kin bud ïa kane ka juh ka nuksa khnang kan wanrah burom ïaka shnong hi baroh kawei.

U Yoowest Khaii Chairman SMC ula ong, kine ki arngut ki khynnah dei kiba wan na ka longïing ba duk bad ki shem jingeh ban bteng ïaki jingpule sha ki kolej kiba khambha, hynrei ula kyntu ïaki ban don ka mynsiem ïaishah ha kano kano ka bynta khnang ka kin lah ban kheit ïa uta u soh jong ka jingjop ha ka jingim jong ki bad ula kitbok rwiang ïaki ba kin nangkiew shaphrang.