Pynkup burom ka sorkar Jylla iaki rang bad thei ialehkai armwrestling & body building

Syllad | The Rising MeghalayaOctober 26, 2022

Ka sorkar jylla lyngba ka tnat Sports & Youth Affairs haka sngi Balang kala wan shakhmat ba kan da pynlong syndon da ka jingialang ba kan pynkup burom ia ki rang bad ki thei ialehkai ka jylla kiba dang shen kiba la ioh ba kin khur ia la ki takma ki jong ki haka jingleit ban iakhun kiba la long shabar jong ka ri.

Ka jingpynkup burom ka la long shwa ia ki lai ngut ki nongiakhun kti ba kynthup ia ka kong Margaret Pathaw kaba la ioh ia ka song pisa kaba 5 lak tyngka nangta Angel Mary Mylliemulong Khunsyiem bad Alexander Lynhgdoh kila ioh khur mar 1 lak tyngka ba la ioh ban khur ia ki takma rnong 43rd World Arm Wrestling Championship bad ka 24th Para armwrestling championship  ba la long ha Turkey.

U Raymond Nongkhlaw bad kumjuh ia u Donbor Rumnong, kiba la ioh ba kin khur ia ka takma rupa bad rnong ha ka jingleit ban iashim bynta pat ka jong ki sha ka rynsan iakob Pro AM Universe Championship ba la long ha Bangkok Thailand bad ka WFF pro AM Asia Pacific Championship  bala long Ho Chi Mihn City, Vietnam.

Nalor kine, ka sorkar jylla, khlem da leh shilling khmat ka la ai sngewbha ruh da ka song pisa kaba long mar 50 hajar tyngka sha kiwei pat ki nongiakhun kti ka jylla ba la mihkhmat ia ka ri ha Turkey kampher wat hadien ba kim shym la lah ban ioh ban kheit ia u soh ka jingjop bad kine ki long u Allan Sun Marbaniang, Banshanlang Terang, Hubert Paliar, Airikmenlang Shabong, Kishore Chetri, Everson Thangkhiew.

Ha kane ka jingialang la wan ban don lang ruh u Myntri ba dei khmkih ia ka tnat Sports & Youth Affairs u bah Banteidor Lyngdoh, u Myntri Rangbah ka Jylla u  Conrad K Sangma, kum u kongsan, u bah John F Kharshiing Working President Meghalaya State Olympic Association, u  Shivnash Aswathi (IAS) Director Sports & Youth Affairs.

Haba kren ha kane ka jingialang u bah Banteidor bad u Conrad, kim lah ban khlem da ieng ban pynkynmmaw ia baroh ba la don ha kane ka jingialang ba da kumno ba ka sorkar MDA kaba la shim khia ban wanrah ia ka jingkylla ha ka kam ialehkai ha kane ka jylla, katta naduh ka jing pyntreikam iaka sports policy, ka jingkyntiew ia ka song khusnam pisa ia ki nongialehkai ba la ioh ban khur ia ki takma na ki rynsan ne lympung ialehkai ba long ha ka thain, ha ka ri bad ba iakhun shabar jong ka ri, bynrap lang ruh bad ka jingburia ia ka pisa ban tei ia ki jaka, ki madan bad shlem ialehkai bad ai jinghikai, ha kaba ka thong jong ka sorkar hi ka long ba man la ki district ba don ha ka jylla, kin don ia ki madan ne jaka ialehkai kiba paka.

Baroh ka pisa kaba la ai sha ki 11 ngut ki nongialehkai ka jylla kala kot T.12.50 lakh.