Pynkup burom ka Sorkar ya kiwa rah nam rah burom ha ki yalehke Sports, ekti 88.63 lakh ka song poisa

Syllad | The Rising MeghalayaFebruary 6, 2024

Ka Sorkar Meghalaya haka 5tarik Thohlakhmi dei sniawsarong yei nam i burom wada rah ki khon khynroo Khyllood ya ka Jylla ka Ri ha Ka Khelo India wa ha kiwi ki yakop iong ka Sports da pynman ko ka yalang lehburom wa kyrpang ha Soso Tham Auditorium Hall Shillong.

Ya kani ka prokram leh burom da wan sakhilang da u Conrad K.Sangma, Chief Minister ka Sorkar, u Shakliar Warjri, Sports Minister, ka Ampareen Lyngdoh, Health & Family Minister ka Sorkar deilang ki heh Sorkar ka Sports Department wa kiwi.

U Conrad K Sangma hei klam kam u kongsan iong kani ka yalang da e u i sniawngooh wa khroo ya ki khynroo khyllood kiwa da rah nam rah burom ya ka Jylla ka Ri ha ka Khelo India wa ha kiwi ki jait yakop wei da ong u leh wa kani ka tayaw waroh u man ko ka tayaw wa kyrpang iong ki khon khynroo khyllood kiwa e mi sap i ka-it ha ki rukom wapher.

Chooh chooh khana u leh wa i daw wa chim ka Sorkar u pynman ya kani ka prokramm toh kwah ko pynioo hakhmat ka pyrthai wa ki Khynroo Khyllood to hem ki ka bynta wa kyrpang hapoh ka imlang sahlang wei ini ym mut i du kat wa snaiwsarong donhi yei wa jop nae  ioh phi ya ki Medal iwa kyrpang toh u man phi ka nongmuna wabha ya kiwi ki khynroo khyllood ka Jylla ka Ri.

Ha lyndet kini kiyi kiyi waroh u Conrad K Sangma e u leh i sniawburom wakhroo ya ka MSOA, ki Sports Association wa em ha kyllein ki thaw iong ka Jylla kamjooh leh ya ka Sports Department kawa da ye u pynman ya ka Meghalaya Games

Iwa kyrpang chooh dap u dei snsiawsarong ya ka Football Team iong ka Jylla kawa da rah nam rah burom ha ka Khelo India, wei ong u leh  toh hok ya ki khon khynroo wow ioh  ki yeini i burom ha kam kani ka sngi.

U Shakliar Warjri, Minsiter Sports & Youth Affairs hei e kyntien da ong wa i e ya ka Cash Award cha kitu ki khynroo khyllood kiwa rah nam rah burom ya ka Jylla ha ka Athlete toh kam wow e mynsien ya ki khon khynroo khyllood iow nang kreh chitom chooh na ki por cha ki por.

Ha kani ka sngi da e da ka Cash Award cha kiwa ioh Medal ha ki jait yakop wapher wei da em hadooh 1170 ngut ki khynroo khyllood emsap heiliang ka Sports kiwa daioh Medal ha ka 5^th Meghalaya Games wa man ha Tura kamjooh leh cha ki khynroo wajop ya ka Football iong ka Khelo India wa man ha Tamil Nadu, khienkyllum waroh ka poisa wada e ha kani ka sngi cha ki khynroo khyllood kynjooh ko kamwa 88.63 lakhs.