Pynkup burom ka St. Anthony’s College ia ka samla Angelia, Femina Miss India Meghalaya 2024

Syllad | The Rising MeghalayaSeptember 3, 2024

Ka St. Anthony’s College ha ka 2 tarik Nailur ka la pynkup burom ia ka samla pule Political Science, ka Angelia N. Marwein kaba la shah jied ban leit mihkhmat ia ka Meghalaya ha ka jingiakob Femina Miss India 2024.

Ia kane ka prokram la pynlong ha phyllaw jong ka college ha ka jingiadon lang ki nonghikai bad ki samla pule nalor kiwei kiwei kiba la shah khot sngewbha ban ialehkmen lang ia ka jingjop bad ka jingnoh synniang jong ka samla Angelia.

Ha ka jingkren u Principal ka St. Anthony’s College u la pyrto ia ka jingiaid lynti jong ka Angelia kum ka samla pule kaba trei minot sha ka jingtbit ha kiwei kiwei pat ki bynta.

“Ka Angelia ym tang ba ka la paw ha ka liang ka jingpule hynrei ka la kiew shaphrang ruh halor ki kam kiba iadei bad ka imlang ka sahlang bad halor ki hok jong ki kynthei bad ka jingialong mar ryngkat kyrdan hapdeng kynthei bad shynrang. Ngi sngew sarong shibun ba kan ioh ban mihkhmat ia ka Meghalaya ha ka jingiakop ba pawnam jong ka Femina Miss India 2024, bad ngi kyrmen skhem ba kan wanrah ka jingsarong ia ka College ka jong ngi bad ia ka Jylla hi baroh kawei.

Ki jingtrei jong ka Angelia ha kaba iadei bad ka Maitshaphrang Movement bad ka jingiadon bynta ha ka EARMACS, ban kyntiew ia ki kam pynroi ha ki thain nongkyndong hapoh Khasi Hills bad ha ka Jylla ki dei kiba la pynpaw halor ki jingnoh synniang na ka bynta ban kyntiew ia la imlang ka sahlang.

Ka Angelia ka la sdang ia ka kam modelling ka kynthup lyngba ka jingiatreilang bad ki kynhun ba pawkhmat bad ban iashim bynta ha ki rynsan pyni riam kum ha ka Delhi Times bad Lulu Fashion Week. Ka jingioh pdiang ba dang shen ia ka khusnam Femina Miss India Meghalaya 2024 la ithuh kum u mawjam sha ki rynsan jingiakop kiba heh hapoh ka ri.

Ha ka jingkren ka samla Angelia ka la pynpaw ka jingsngewnguh ia ka St. Anthony’s College kaba la ai ia ka jingkyrshan kaba radbah ha ka jingiaid lynti ka jong ka.

“Ka St. Anthony’s College ka la long ka shlem ai jingnang jingstad na ka bynta jong nga, bad ki jingtip bad ki jinghikai kiba nga la ioh pdiang ki la iarap shibun ia nga ba ngan lah ban long kumne kumba nga long mynta. Nga dap da ka jingsngew burom ban ioh lad ban mihkhmat ia ka Meghalaya bad ban rah ia ka burom jong kane ka jaka pule ha kane ka jingleit iakhun ia kane ka jingiakop Femina Miss India 2024 pageant.”

Ka lahduh ha ka Femina Miss India 2024 kan ioh ban mihkhmat ia ka India ha ka jingiakob ha ka rynsan thei bhabriew ka pyrthei ne ka 73rd Miss World pageant. Ka Miss India ba mynta ka Nandini Gupta na Rajasthan kan long ka nong pynphong ia ka pansngiat   nongjop ha ka sngi kaba kut jong kane ka jingiakob.