Pynkup burom ka Thomas Jones Synod College iaki samla kiba wan shakhmat haka Graduation Day

Syllad | The Rising MeghalayaSeptember 21, 2024

Ka Thomas Jones Synod College, Jowai ka la pynkup burom iaki 180 ngut ki samla pule kiba la pyndep iaka kyrdan pule Graduate haka Bachelor of Arts (BA), Bachelor of Commerce (BCom) Bachelor of Science (BSc) bad HSSLC haka jingrakhe iaka ‘Graduation Day’ ha phyllaw ka kolej haka 21 tarik Nailur.

Iaka jingialang pynkup burom la pyniaid da Dr. PMB. Rani Assistant Professor, Department of Botony haka jingdonlang u kongsan u Rev. KL Giri Member Governing Body Thomas Jones Synod College, ki nonghikai bad ki samla pule.

Shwa ka jingpynkup burom la ioh ka jingkren pdiang na ka Principal ka kolej ka Dr.Iaraplang Dkhar bad ka jingpule bad duwai na ka Kong M Sutnga.

U Rev. KL Giri haka jingkren ula pynpaw ka jingkmen ban iohsngew ba ka Thomas Jones Synod College kala sei haduh 180 ngut ki samla kiba la pyndep iaka jingpule mynta u snem bad ula ai khublei kyrpang iaka jingjop ka jong ki.

Ka long kaba shisha bad kaba sngewsih ban iohi ba bun ki samla kiba la pyndep iaka jingpule ki fail pat ban im ka jingim kaba don jingmut bad kaba jop kumta u Rev. Giri ula kyntu iaki samla pule kane ka kolej ban im ka jingim kaba bha ba miat bad kiba jop ha ka jingim.

Ha une u snem 180 ngut ki samla pule kila shah pynkup burom, na kine 11 ngut ki Department Topper bad uwei u nongbat kyrdan haka NEHU. U Happystone Syngkon marwei u wan haka 7th rank haka Education Department.

Kiwei pat kiba wan hakhmat ha college na ka English Department la ioh da ka Trewasara Hadem, naka Khasi la ioh da u Quickly Pala, na ka History la ioh da ka Rosyness Dkhar, naka Political Science la ioh da ki arngut ka Cherisa Shylla bad ka Remembermi Shylla bad na ka Philosophy Department la ioh da ka Shabanam Begum.

Haka Bachelor of Commerce (BCom) iaka nam Department Topper la ioh da u Dapyntngen Mi Talang. Haka Bachelor of Science (BSc) iaka nam Department Topper la ioh da ka Abigail Devian Rymbui Zoology, u Lemiki Bang Chemistry bad ka Sakani Phawa naka Botony.

Haka HSSLC la pynkup burom ia u Shiningstar Myrphet naka Arts Stream, u Lewanki Dhar naka Science Stream bad Sanborlangki Rupsi Commerce Stream.

La pynphuh pynphieng iaka sngi kyrpang jong ki samla pule da ki jingrwai ba la ia shim bynta da ki samla pule kane ka kolej.