Pynkup burom ka tnad Animal Husbandry bad ka HFU ïa u ba shna hi iaka kor pdem pylleng bad kha syiar ha West Jaintia Hills

Syllad | The Rising MeghalayaAugust 25, 2021

Ka ophis jong u District A.H & Veterinary Officer, West Jaiñtia Hills District, Jowai ryngkat ka jingiatreilang ka Hills Farmers’ Union Thadlaskeiñ haka sngi ba Ar kala pynkup burom ia u Forme Kharsahnoh uba la shna hi ïaka synduk pynkha ne pdem ïaki pylleng syiar kaba la tip kum ka Incubator.

U Forme Kharsahnoh udei uba naka shnong Sohphoh kaba hap haka Thadlaskeiñ Block, West Jaintia Hills District bad ula lah ban shna hi iaka synduk ban pdem iaki pylleng syiar.

Kane ka incubator kadei kaba lah ban pdem haduh 700 tylli ki pylleng syiar. Ia kane ka synduk ula pynbit pynbiang hi nadong shadong bad ban pynioh iaka bording ula pyndonkam da ka inverter khnang ban lait naka jingshah ktah haba duh ka bording ban pynneh iaka jingshit katkum ka jingdonkam hapoh ka synduk.

Kane ka ophis u District A.H & Veterinary Officer bad ka HFU kum shibynta ban ai mynsiem ïa u ba un nang lah ban pyniar iaka kam ri syiar bad pynroi iaki syiar kala pynkup burom ia u bad ai sngewbha ia u da ka kor ot phlang kaba la tip kum ka chaff cutter.

U Forme Kharsahnoh, ula ong ba ka daw kaba la pynpyrkhat ia u ban shna ia kane ka synduk pdem pylleng kadei hadien ba ula iohi ba um lah satia ban pynmih ne pynroi bun ki syiar. Bunsien ki syiar shnong yn da kila ioh khun, ki khun syiar ki shu iap ei hadien ba ki la hap ban shah ia u slap ka lyer bad shah iuh hala ka jong ka kmie haba ki iaid ki ieng sha madan.

Ia kane ka kor la shna da ka buit kaba ula ioh lyngba ka internet bad ryngkat ba u nang ban shna bording nalor ka jingtip jingnang jong u ha kaba pyniadei ne pynbiang iaka jingdonkam bording ban pynneh iaka jingshit jingsyiad hapoh katei ka synduk, la ong u Forme bad u angnud shuh shuh ban pynjanai bha iaka rukom shna khnang ba kan long automatic.

U Forme nalor ba ri syiar, u ri iaki sniang bad u rep u riang bad kiwei kiwei.

U DC Garod LSN Dykes ula kyntu ban shimkhia iaka kam ban nangkiew shaphrang bad ka jingstad jingshemphang jong u ka rah nam burom iaka District bad Jylla hi baroh kawei. Ula kyntu ia u ba um dei ban buh daka jinglehraiñ hakhmat haba pyrshang ia kano kano ka kam, hynrei shim ba ka dei ka lynti shaka jingjop.

Kiwei pat ba ai jingkren ki kynthup u Dr. DI Kjam DAH&VO, Jowai, Chanbor Rymbai, Secretary Hills Farmers’ Union Thadlaskeiñ, u General Secretary Hills Farmer Union sengkmie u Allfondbirth Kharsyntiew bad kiwei.