Pynkup burom ka Wildlife 19 ngut kiba pyllait im ïaki mrad khlaw

Syllad | The Rising MeghalayaOctober 23, 2019

JOWAI: Ka Ophis jong ka Divisional Forest Officer, Wildlife Division, West Jaintia Hills District kala pynkup burom haduh 19 ngut kiba pyllait im ïaki mrad khlaw ha kylleng ki jaka ha East bad West Jaiñtia Hills District haka sngi pynhap pyrda ïaka Wildlife Week Celebration 2019 kaba long ha Ladthadlaboh Indoor Hall, Jowai haka sngi ba ar.

Ïa kane ka Wildlife Week la sdang naduh ka taiew ba nyngkong u bnai Risaw. Ka phang pdeng jong kane ka taiew lehkmen jong ka Wildlife kadei “Life below Water: For People and Planet.”

Kine ki 19 ngut kila ioh ban pyllait ïaki skei, ki khla thapsim bad kiwei kiwei ki jait mrad kiba kyrpang ha kane ka Rilum Jaintia jong ki.

Kine kiba shah pynkup burom ki kynthup iaka kong Piar Sana, Mukhaialong, Robinson Rymbai, Khliehtyrchi, Heimon Pariat, Mookyndur, Nathanial Patwet, Khimusniang, Hin Ryngkhlem, Mihmyntdu, Meverius Pohlang, Nongtalang, Beneshwa Suting, Salaroh, Jowai, Hundred Phawa, Mukhaialong, Welding Suchiang, Saba, Rilang Sari, Mukhla, Kanwan Suchiang. Moomon, Mihmyntdu,  Oncemore Mylliem, Ratacherra, Darles Suting, Nartiang, Do Raliang, Ksehrynchang, Romel Lyngdoh, Rachai, Hih Rymbai, Wapung Shnong, Samedonhi Pale, Caroline Colony Jowal, Thik Talang. Mynthong bad u Diagratis Sumer, Sohkha Mission.

La sam ruh ïaki khusnam sha ki khynnah skul kiba jop haka jingïakop Quiz, Extempore speech, Essay, ka jingiakop shnongdur bad ka ïakop dro dur.

Ha kane ka sngi ka tnad Wildlife kala pyllait paidbah ruh iaki dur jong ki sim kiba la shondur ha kylleng ki jaka.

U CP Marak IFS, Principal Chief Conservator of Forests & Head of Forests Force ula long kum u kongsan haka jingiadonlang ka Additional Deputy Commissioner West Jaintia Hills ka Kong RS Manner, Joint Director Education and Literacy kong D Khongiong, AK Srivastava, IFS, Addl. Principal Chief Conservator of Forests (Wildlife), Kong Heisa Lato, DFO Wildlife bad kiwei kiwei.

U PCCF CP Marak haba kren ula ong ba ki wah ha Jylla ki dang khuid ban pyndonkam u briew bad wahduid ki dang khuid bad dang lah ban lap ïaki jingthaw ba im hapoh um.

Ula ong ha jylla bun tylli ki wah la pynbna kum ki fish sanctuary bad lyngba ka jingiatreilang ki shong la lah ban pynneh pynsah bun ki khlaw ha kylleng ka Jylla Meghalaya.

Ha jylla ka lyer ruh ka dang khuid haba nujor bad kiwei kiwei jylla haka ri bad la kyrkhu iaka jylla da ka mariang kaba itynnad bad dang ioh ruh ia ki um ki wah kiba khuid bad ki jinbthaw ba im ba harukom.

Ula ïaroh ruh ïaki nongpyllait im ïaki mrad ki mreng bad ula ong ba kane kalong ka nuksa ba kiwei kin bud ban pynneh pynsah ïaki mrad ki mreng bad iaki khlaw ki btap.

Ula iathuh ba ka sorkar lyngba River Rejuvenation Committee kala buh ka thong ban pynim ïaka Wah Umkhrah ha Sor Shillong bad ka Wah Myntdu bad ka Lukha ha Rilum Jaiñtia.