Pynkup burom ka Women’s Welfare Seinraij Jowai iaki samla pule kiba wan shakhmat

Syllad | The Rising MeghalayaOctober 30, 2023

Ka Womens Welfare Organisation (WWO) Seinraij Jowai kumba ju long manla u snem haka 28 tarik Risaw ruh ka la pynlong ka jingïa kynduh lang kaba kyrpang jong ki khun kynthei bad la pynlong ruh ka jingpynkup burom iaki khun samla ka Niamtre kiba la pyndep iaka kyrdan P.hd bad ia kito kiba ioh 80% shaneng haka eksamin haka kyrdan SSLC bad HSSLC.

Iaka jingialang la pynïaid da ka samla Dathrang I Passah bad u samla Salanda-O Langdoh, ka Wandalan Dkhar, Chairperson WWO-Seinraij Jowai ka la ai ki kyntien pdiang burom nangta ka Ridaka Lamar, Vice-Chairperson WWO-Seinraij Jowai ka la ai ka nguhblei nguhsyiem bad u Hunbeitki Dkhar, Secretary WWO-Seinraij haba kut ula ai ki kyntien khublei.

Ha kane ka jingïa kynduh lang la wan sakhi lang ruh da ka Bandarisha Lyndem, Chief Engineer PHE ka sorkar Jylla kum ka kongsan, u Antonio Lakiang, Deputy Secretary ka sorkar jylla kum u symbud kongsan, u Hercules Toi, President Seinraij Jowai, u Arwotki Sumer, General Secretary, Seinraij Jowai ki riew rangbah, ki longkmie longkpa bad ki khun samla ka Seinraij Jowai.

U Hercules Toi ula kren halor ka National Education Policy 2020, ula ong ka jingpyntreikam ia kane ka policy hapoh ka Jylla kan long ka jingmyntoi kaba khraw naduh ki khynnah kiba pule haki kyrdan kiba rit haduh kiba pule haki kyrdan kiba shalor.

U Antonio Lakiang ula kren ai mynsiem iaki samla da kaba ong ban buh iaka thong bad angnud jong ki, haka jingsngew jong ki marwei, namar kaei kaba phi ïoh kaei kaba phi kwah dei tang ma phi hi kiba sngewthuh la phi lah ne ym lah ban leh, ymdei ban sngap iaka jingong jong kiwei.

Ki khun ka Niamtre kiba la ïoh pdiang ka jingpynkup burom ha une u snem ki long haka kyrdan SSLC 11 ngut, haka HSSLC 3 ngut bad 2 ngut pat haka kyrdan Doctorate bad iaka jingpynkup burom la pyndep da ka kongsan bad kiwei ki riew rangbah.

Napdeng kine baroh, 2 ngut dei kiba ïoh iaka kyrdan Seinraij Topper kita ki long ka Mayanka Pde na dong Salini Mihmyntdu kaba pule ha Jowai Govt. Public School bad ka la pass iaka ICSE Examination 2023 da kaba ioh haduh 94.3% bad 5 tylli ki Distinction kynthup ka English, Khasi, Social Science, Mathematics, Science & Home Science.

Uwei pat u samla u dei ka Wansame Pakyntein uba pule ha Sri. Chaitanya Junior Kala Sale Pragathi Nagar, Hyderabad ula ioh 90.21% bad ioh distinction ha ki 4 tylli ki subject kynthup ka English, French, Zoology bad ka Botony.

Shuh shuh ha kane ka jingïa kynduh ki khun kynthei ka Seinraij ka la don ruh ka jingpynkup burom kaba kham kyrpang iaki 2 ngut ki khun ka Niamtre kiba ioh iaka kyrdan Doctorate kita ki long u Dr. Lincoln Dkhar na dong Chilliangraij uba dei u khon ka Kong Delta Dkhar bad u (L) Frando Sungoh, u Lincoln ula pyndep iaka jingpule Ph.D haka subject Chemistry na NEHU, Shillong ha u snem 2023.

Ka Dr. Toba Lamare na Ummulong kadei ka khun jong ka Kong Lukhimai Lamare bad u (L) Lemison Lyngdoh. Ka Dr. Toba ka la pyndep iaka Ph.D ha ka Subject Education na NEHU, Shillong ha u snem 2017.

Ka Kong Badarisha Lyndem kum ka kongsan, ka kren ai mynsiem iaki samla ban trei shitom bad ban ri sumar iaki adong niam adong blei khnang ba ka burom jong ka iing ka sem, ka shnong ka thaw kin lah ban rah hakhmat ka pyrthei.

La pynphuh pynphieng ia kane ka sngi da ki jingshad jingrwai ba la shim bynta da ki samla ka Seinraij Jowai, ki longkmie ka Loompyrdi Iongpiah bad ki samla ka Umchangiar.