Pynkup burom ki ar shnong ia u Saron Paswet MDC Jowai South

Syllad | The Rising MeghalayaDecember 17, 2024

Ki ar tylli ki shnong ka Umladkhur bad ka Thangbuli, ki shnong kiba ju hap haka MDC Constituency Jowai South bad kiba la shah pynhap noh haka jingpynbeit contstituency thymmai ka Jaintia Hills Autonomous District Council (JHADC) sha ka War East bad War Central kila pynkup burom ia u MDC jong ki u ma Saron Paswet.

Kane ka jingpynkup burom jong kine ki ar shnong ia u MDC Saron Paswet ka long kum ka dak ban pyrto iaki jingsynniang jong u sha ka kam pynroi pynpar ha kine ki ar tylli ki shnong katkum ka bor jong u kum u MDC ka thain.

Iaka jingialang pynkup burom la pynlong ha iing hall jong ka Dorbar shnong Umladkhur haka 16 tarik Nohprah haka jingdonlang ki nongialam shnong jong ki ar Dorbar shnong, ki nongshong shnong kynthup naduh ki longkmie longkpa ki samla nalor kiwei kiwei.

Kine ki ar Dorbar shnong kila pynkup burom ia u Ma Saron Paswet da ka Jain Ryndia bad memento kum ka dak ka jingsngew burom halor ki kam pynroi kiba ula wanrah hapoh ki ar tylli ki shnong.

Lah ban kdew ba ha Jowai South MDC Constituency la pynkynriah iaki 7 tylli ki shnong kynthup ka shnong Mupyut, Umsalang, Moosakhia, Samanong, Shkenpyrsit, Thangbuli bad Umladkhur bad iaka Thangbuli la pynkynriah sha War East, War Central bad Amwi Khliehtyrshi.

U Ma Saron Paswet haka jingkren ula pynpaw ba u dap da ka jingsngewnguh bad ai ka jingkhublei kaba kyrpang iaki ar dorbar shnong halor ka burom kaba kila pynkup ïa u. “Ngam shym la poi pyrkhat ba ngan shah pynkup burom, nga dap da ka jingsngewnguh ba phi la pynkup burom ia nga namar ki kam ba bha hapoh ki shnong ki thaw ki jong phi,” ula ong bad bynrap ba kum u nongmihkhmat kadei ka kamram jong u ban trei naka bynta ki paidbah ha kine ki 5 snem kiba la leit.

Haba u kyrtiang dien haka election MDC 2019, u Ma Paswet ula iathuh ba ka Umladkhur bad Thangbuli ki pyni shisha iaka jingieid jong ki ia u (Saron) namar haki Election kiba la dep, kine ki ar shnong kim ju peit ia u briew ne Party bad ki peit iaka tang iaka Bom, hynrei ha u 2019 ka jingkylla la wan bad ki la jied noh ia u briew uba lah ban iarap bad wanrah shisha iaka roi ka par hapoh shnong poh thaw.

“Nga panmap ia kiba ngam lah ban iarap bad khublei shibun ia kiba la iarap ia nga” la ong u Ma Paswet da kaba pynpaw ruh ka jingsngewdiaw halor ka jingbym iohlad shuh ban ia don bynta lang bad ki 7 shnong ha kane ka election MDC ban wan.

Ban pynskhem iaka jingieid jong u iaki 7 shnong, u Ma Saron ula ong ba un iakhun ha kane ka election ban wan bad lada u jop ne rem, ka jingieid jong u iaki nongshong shnong kan iaineh iaisah junom la junom da kaba kular ruh ban iadon bynta ha kano kano ka por kaba ki donkam ia u.

Ula kyntu ruh iaki baroh ki paidbah jong ki 7 shnong ban ai jingiatreilang bad uno uno u nongmihkhmat u ban jop na kano kano ka Constituency kaba ki don.

Iaka jingialang pynkup burom la pyniaid da u waheh shnong barim ka Umladkhur Ma Wanri Khyriem bad la ioh ka jingkren lyngkot na u Ma Rimon Lyngdoh Waheh shnong Umladkhur, Ma Yoolang Buam Assistant Waheh Shnong Thangbuli nalor kiwei kiwei kiba la pynsngew iaki kam pynroi kiba u MDC ula wanrah na ka bynta ka bha ka miat bad ka roi ka par jong ki shnong.