Pynkup burom ki Muster Roll iaki nongialam nongkyrshan bad iaki khynnah ba pass bha haka 6th Annual General Meeting

Syllad | The Rising MeghalayaDecember 11, 2021

Ka All Jaintia Muster Roll Workers & Labour Union (AJMRWLU) ka la pynlong ïaka jingïalang paidbah ba shisien shisnem ne “6th Annual General Meeting” haka jingwan iashim bynta shongshit ki dkhot na kylleng ki shnong.

Ïaka jingïalang la pynlong ha madan Jrisalein Jowai haka sngi Thohdieng haka jingpynïaid da ka Banaras Dhar, General Secretary Khliehriat Block bad ki kyntien maitphang na u Khroo Lamsalanki Pariat, President ka synjuk.

Ha kane ka sngi la pynkup burom kyrpang ïaki nongïalam ba hakhmat ka seng kiba kynthup ïa u Khroo Lamsalanki Pariat, u Titos Shadap, ka Manda Bareh, ka Daïoowanphi Ïakai, ka Lanaika Kyndiah bad u Shanbor Dkhar.

Ka AJMWLU kum ka dak ka jingsngewnguh sngewburom ïa ki briew kiba la ïarap ïaka ha kiba bun ki kam, da ka jingsngewkhia ka la shim ruh ban pynkup burom ïa u Sanki Lamare Waheh shnong Raliang, u Oriland Shylla, u Garlan Langdoh, ka Hakani Pariat, u P. Lyngdoh Waheh shnong Chutwakhu bad ïa u Deikisar Lakiang.

Nalor kata kum ka jingpynshlur bad ai mynsiem ïaki khynnah pule kiba la poi shakhmat haki eksamin bapher kiba ïoh 80 % shaneng, ka AJMW&LU kala pynkup burom ruh ïaki da ka Academic Achievement Award 2021.

La pynphuh pynphieng ïaka jingïalang da ki jingrwai jingshad bad kiwei kiwei ba la shim bynta da ki dkhot ka seng.