Pynkup burom u Lat ka Jylla ia ka lahduh jong ka lympung Subroto International Cup U-15

Syllad | The Rising MeghalayaSeptember 2, 2024

U Lat ka Jylla u CH Vijayashankar haka 2 tarik Nailur u la pynkup burom ia ka kynhun ialehkai jong ka Nongjri Presbyterian Secondary School, Ri Bhoi kaba la ioh ban rah ia ka nam lahduh ha ka lympung ialehkai phutbol “63rd Subroto International Cup” kaba la kut noh dang shen ha Bengaluru.

Ha kane ka jingpynkup burom la ia don lang ruh u Myntri Rangbah ka Jylla u Conrad K Sangma, u Bah Shakliar Warjri Myntri ka Tnad Sports & Youth Affairs ka Jylla, u Bah Charles Marngar MLA ka Mawhati lem bad kiwei pat ki heh sorkar.

Ha ka jingkren kum u Kongsan, u Lat ka Jylla u la ong, “Namar ia lade Nga dei u riewialeh sports, Nga lah ban pynithuh bad kine ki khynnah ialehkai. Ban jop ha kane ka lympung ialehkai kaba heh kam dei satia ka ban shu shim sting. Nga ngeit ba ka por kaba bha tam ban nang na ka bynta uno uno u khynnah ka long hapdeng ka rta 6 haduh 16 snem, da kaba pynleit jingmut halor kane, ka long shisha kaba ai mynsiem ban iohi ia ka jingtbit ha kane ka rta.”

U Lat u la pyrto ruh ia ka jingshimkhia jong ka Sorkar Jylla ban kyrshan ia kane ka kynhun ba kan lah ban ioh ia ka jingjop ha kane ka lympung. U la bteng ban kyrpad ia ka sorkar ba kan bteng ruh ban shimkhia ban kyntiew ia ki kam ialehkai namar ki samla ki long kawei na ki nongkynti ba kongsan tam jong ka Jylla.

Ha ka jingkren plie u Myntri Rangbah ka Jylla u Conrad K Sangma u la ong, “Kane ka dei ka khyllipmat kaba sngewmyllung bad kaba sngewkmen. Ka dei ka jingleh sbun, jingsngewrit bad ka jingdon ia ka mynsiem pyrkhat bha jong u Lat, bad ngam pat kynmaw ban don kino kino ki Lat ki ban pynkup burom ia kino kino ki nongialehkai bad nga ai khublei kyrpang ia u halor kane ka sienjam.”

Kumjuh haba pynpaw halor ki sienjam kiba ka sorkar ka la shim ban kyntiew ia ka sports, u Conrad u la ong ba ka Sorkar ka la bei tyngka shibun ha kaba iadei bad ka jingtei ia ki madan ialehkai ha kine ki khyndiat snem ba la dep. U la ong ruh ba kane ka sorkar ba mynta ka la lah ban pynlong ruh haduh laitylli na ki santylli ki lympung ialehkai Meghalaya Games. Nalor kata u la pyntip ba ki Sports Association jong ki jait jingialehkai bapher bapher ki la ioh ia ki song jingiarap na ka bynta ban kyntiew, ban pynbha bad ban lah ban pyniaid ia ki kam ialehkai sports.

Haba pynkut, u CM u la ong, “Haba kylli halor ki jingmih bad ki jingthew ban thew ia ka jingkiew jong ki kam ialehkai bad kumjuh ruh shaphang ki kam bei tyngka bad ka jingshna ia ki madan ialehkai, nga ong ba ki sap ialehkai bapher bapher kiba don ha ki samla lyngba ki jingialehkai bapher bapher ka dei ka phang kaba la wanrah ka jingsngew hun. Kaba pynsngew hun shuh shuh ka long hadien ba nga la iohsngew ia ka jingkren jong u Manager ka kynhun, u Bah Charles Marngar, nga da sngewkmen ban iohsngew ba ki khynnah ki la kut jingmut ban ioh ia ka jingjop wat hapdeng ki jingeh namar ka jingbym biang ki madan ialehkai.Khlem artatien ngan iarap ban pynioh ia ki madan ialehkai ba shipor na ka Chief Minister’s Special Development Fund kat haduh ban da pynioh ia ka madan ialehkai kaba paka hapoh ka thain.”

Ki player kane ka kynhun kiba la shah pynkup burom ki kynthup ia u Yeomanly Son Shadap, lainehskhem Marboh, Prosperwell Ryntong, Richmond Lapang (Captain), Prosperwell Ryntong, laisynroplang Syiemlieh, Franky Kharkrang, Dasuk Banphrang Diengdoh, Marc R Marak, Shanbok Basaiamoit, Nangsanbha Warjri, Banteilang Malieh, Pynshngain Khapew, Samuel Malieh, Namebanlam Nongkseh, Chanjib Chettry, Thrisilbirth A Sangma, Jeffery Warlarpih bad u  Pynkhreh Nongkseh.