Pynkup burom u MLA Amlarem ia ki 128 ngut ki samla ba pass bha haki eksamin

Syllad | The Rising MeghalayaOctober 2, 2021

U Myntri ka tnad pule puthi uba dei ruh u MLA ka War Jaiñtia u Ma Lahkmen Rymbui kum shibynta ban pynshlur ïaki samla kiba la pass bha haka eksamin bapher bapher ula ai khusnam ïaki da ka song pisa ryngkat ka syrnod haka jingialang kaba long ha Syiem Jingsuk Hall, Amlarem.

Ha kane jingpynkup burom la iadonlang u Bah Bayar Kupar Langwa IFS, PCCF & Meghalaya, ka Kong Idashisha Nongrang IPS, Additional Director General of Police Meghalaya, SDO Amlarem Civil Sub Division, U Abhilash Baranwal,  u Fr. G. Shangpliang Parish Priest Amlarem, Daniel Khongsit President ka Synjuk Waheh Shnong War Jaiñtia nalor ki kmie ki kpa ki khynnah.

Haduh 128 ngut ki khynnah bad samla kiba la pass haka eksamin SSLC, HSSLC haduh ka Degree Level kila shah pynkup burom.

U Dimarkithmu Gayang uba la wan haka thup Top-10 jong ka eksamin HSSLC (Science) ula ïoh ïaka khusnam song pisa kaba T. 10,000/-

Ki samla pule kiba la ïoh khur 90% shaneng ki la ïoh ïaka song pisa kaba T. 5000 tyngka. Kiba ïoh 80% shaneng ki ïoh ïaka song pisa kaba T.4500 tyngka katba kiba ïoh 70% shaneng ki ïoh ïaka song pisa kaba T. 4000.

U Ma Lahkmen Rymbai haba kren ula ong ba ki khynnah ne samla pule mynta kim duna shuh haka liang ka pule puthi, hynrei ula pynpaw ka jingsngewkhia ba ym don shuh kiba pass IAS, IFS, IPS na kane ka Jylla kumjuh na War Jaintia. Ula pynshlur ia ki samla pule ban iakhun ia kine ki kyrdan kynthup iaka MCS, MPS kiba long ki paia ban pynbha iaka synshar khaddar.

Ula kyntu ïaki samla pule ban trei shitom namar ka Jylla ka donkam ïaki. Ula kitbok kitrwiang ïaki baroh ki samla pule ba kin jop haka jingim pule puthi jong ki.

U Bah Bayar Kupar Lyngwa bad ka Kong Idashisha Nongrang haka jingkren ki la ai khublei ïa baroh ki samla pule kiba la pass bha wat hapdeng ka jingpynthud na ka jingwan lynsher ka jingpang khlam COVID-19, hynrei ki trei shitom khlem da pynlehnohei ïaka por.