Pynkut ka EDC ka Kiang Nangbah College ia ka Entrepreneurship Development Programme ba shi taiew

Syllad | The Rising MeghalayaNovember 11, 2024

Ka Entrepreneurship Development Centre (EDC), Kiang Nangbah Government College (KNGC), Jowai, ka la pynkut noh ia ka ‘Entrepreneurship Development Programme (EDP)’ kaba shi taiew kynthih na ka bynta ka Batch kaba ar kaba la sdang naduh ka 4 haduh ka 8 tarik u Naiwieng 2024.

Kane ka sienjam ka thmu ban pynkhreh bad pyntbit ia kito kiba angnud ban seng ia ki kam ki jam lyngba ki jinghikai bad ki jingpyntbit kiba ki la ioh pdiang khnang ba kin long ki nongseng kam seng jam kiba jop.

Kane ka prokram ka thmu ban aijinghikai ia 10 ngut ki nongiashim bynta, kaba kynthup ia ki samla pule, bad ki nongseng kam kiba dei ki trai shnong kiba la shah jied na ka Entrepreneurship Awareness Programme (EAP) hadien ba ki la lah ban pynpaw ia ki jingmut jong ki ha ka liang ka sengkam seng jam.

Kine ki nongiashim bynta ki dei na kylleng ka thain jong ka East bad West Jaintia Hilla District.Ha kane ka prokram kaba shitaiew kynthih ki la don ki jingiamir jingmut bad ki jingiakren halor ki bynta bapher bapher bad halor ki kam shna kti kiba thmu ban pyni ia ki sap ki phong khnang ban kyntiew ia ka jingtbit ha ka sengkam seng jam bad ban kyntiew ia ka jingsngewthuh ba kham janai halor  ki kam khaii pateng.

Ki jingiamir jingmut kiba kongsan jong kane ka prokram lyngba ki riew shemphang bad ki nongseng kam seng jam ki kynthup halor ka Enterprise Development, Financial Literacy shaphang ki nongseng kam, Business Planning, Business Development Model, Market Research, Human Resource Management, Digital Marketing, Branding, social media and Mobile Commerce, Government Schemes and Support.

Nalor kata ki nongiashim bynta ki la ioh ruh ia ka lad ba kyrpang ban iakynduh bad ki riew shamphang ha ki kam karkhana, ki nongseng kam seng jam kiba tbit bad seisoh bad ki nonghikai kiba la iasam ia ki jingshem ba kordor bad ha ki jingshem ba shimet jong ki kaba la nangai mynsiem shuh shuh ia ki nongiashim bynta.

Ha kane ka prokram la pyni ruh ia ki business plan da uwei pa uwei u nongiashim bynta nalor ki Q&A sessions kiba la plie lad ia ki nongiashim bynta ba kin pynbha shuh shuh ia ki business plan jong ki ban pynpaw ia ki sap jong ki ban ialeh pyrshah ia ki jingeh ha ka pyrthei seng kam seng jam bad ban ioh ia ki jingmut ban ialeh pyrshah ia kine ki jingeh.

Da ka jingjop jong kane ka EDP kaba ar, ka Entrepreneurship Development Centre, KNGC ka pynskhem biang ia ka jingaiti jong ka ban kyntiew ia ka kam seng kam seng jam kum ka lynti kaba lah ban treikam bad kaba ai jingmyntoi.

Ka Centre ka khmih lynti ban pdiang shuh shuh ia ki jingthmu kiba pynkupbor bad pynshlur ia ki jingangnud seng kam seng jam jong ki paidbah. Ka Entrepreneurship Development Programme ba shi taiew ka ban wan na ka bynta ka kynhun ne Batch kaba lai kan sdang ha ka 11 tarik u Naiwieng 2024.