Pynkut ka KVK Jaiñtia Hills ïa ka Krishi Samridhi Swarna Week da ka tamasa Ginger & Turmeric Festival

Syllad | The Rising MeghalayaDecember 12, 2024

Ka ophis Krishi Vigyan Kendra (KVK), Jaintia Hills haka 11 tarik Nohprah kala pynkut noh iaka Krishi Samridhi Swarna Week (KSSW) ne ka jinglehkmen iaka jingroi ka rep ka riang da kaba pynlong iaka Ginger & Turmeric Festival haka jingdonlang u Deputy Commissioner ka West Jaintia Hills District Bah BS. Sohliya, IAS kum u kongsan.

Ka jingrakhe iaka Krishi Samridhi Swarna Week (KSSW) kala sdang naduh ka 6 tarik Nohprah lyngba ki prokram bapher bapher halor ka thong ban kyrshan iaki nongrep lyngba ki jinghikai, ki workshop, ki Camp ai jingsumar iaki jingri jingdup bad kiwei kiwei pat ki bynta.

Ha kane ka Ginger & Turmeric Festival kaba la long ha phyllaw ka ophis KVK kaba don ha Wahiajer West Jaintia Hills District, ki nongrep na kylleng ka District kila wan ban pyni nam iaki jait sying bapher bapher ba ki thung kum sying bah, sying makhir, sying blai, sying Kmoh bad u shyrmit Lakadong nalor kiwei kiwei ki jait jingbam jingdih ba shna lyngba u sying.

U Bah BS Sohliya haka jingkren ula pyrto iaka jingtreikam bad jingiadei hapdeng ka KVK bad ki tnad treikam sorkar hapoh ka District na ka bynta ka bha ka miat jong ki nongrep bad ula kyntu ruh iaki nongrep ban pyndonkam da ka rep Organic ne ka rukom rep kaba khlem da khleh dawai khnang ban shngain ka koit ka khiah ki nongbam.

U Bah BK Sohliya, Chairman ka Meghalaya Farmers (Empowerment) Commission haka jingkren, ula pyntip ba dangshen u Lakadong jong ka Jaintia Hills ula ioh iaka GI Tag (geographical indication) ba la ithuh kyrpang da baroh kawei ka pyrthei ba u wan na ki artylli ki District ka rilum Jaintia. Hynrei kaba sngewsih ka long, ba bun kiwei kiwei ki jylla ki kam ba maki ruh ki thung ia u shyrmit Lakadong.

Ula kyntu iaki ophisar sorkar ban shimkhia bha halor kane bad ban iasnohkti lang bad ka Union khnang ba kiwei ki jylla, kiwei ki nongthung kin nym lah shuh ban pyndonkam iaka kyrteng jong ka Lakadong.

Nalorkata u Bah BK Sohliya ula pyntip ruh iaka jinglap jingshem lyngba ki tes iaka jingdon ka DDT ha u shynmit Lakadong, da kaba u kyntu ruh iaka bor pyniaid District ban peit bha halor ka jingpyndonkam iaka DDT ne ka dawai pyrjong ban tehlakam iaka jingpang Malaria kan kham duna noh khamtam haki jaka ba jan ki kper ba rep bad tyllong um ba leit shaki jaka rep.

Shuh shuh u Bah Sohliya ula pyntip ruh ba ka Curcumin ba sei na u shyrmit wat la kam lah ban pynjem hynrei ka lah pat ban pynsangeh iaka jingpur jong ka Pancreatic cancer kaba ka jingtes ka dang iaid mynta hapoh IIT Guwahati bad la lap ba u shyrmit, kumjuh u sying kpoh bad Sohsyiem kine lai tylli ki jingthung na ka jylla Meghalaya ki don kata ka dawai bah kaba lah ban pynjem ia bun ki jait jingpang.

Kiwei de kiba la ai jingkren ki long ka Kong D Lyngdoh Jt. Director Horticulture, Dept of Agriculture & Farmers’ Welfare ka sorkar Jylla, ki ophisar na ka ophis District Horticulture West Jaiñtia Hills bad East Jaiñtia Hills kiba la pynpaw ia ka jingdonkam ban rep ia u shyrmit da ka rukom kaba thymmai bad ka jingdonkam ban bishar bniah ia ka dor ha kaba pyniaid iew naduh ba dang thymmai haduh ba la pynkhreh.

Hadien ka jingialang u kongsan ula pyllait iaki kot lynkdop bad sam khusnam shaki nongrep.