Pynkut ka Rotary Club Jowai iaka jingrakhe 25 snem ka jingiaid lynti

Syllad | The Rising MeghalayaDecember 20, 2021

Ka Rotary Club Jowai kala pynkut noh iaka jingrakhe lyngkhuh snem ba 25 ka jingiaid lynti naduh ba la seng iaka Rotary Club Jowai ha u snem 1995-2021.

Ia ka jingialang pynhap pyrda la pynlong ha ïing dorbar ka Loomsoooiung, Newhill haka jingpyniaid u Rtn SK Lato uba long ruh u Chairman Silver Jubilee Celebration bad u myntri sorkar barim, u Rtn Manas Chaudhuri ula long kum u kongsan.

Ïaka report ka jingïaid lynti jong ka Rotary Club Jowai haki 25 tylli ki snem la pynsngew da ka Rtn EF. Gatphoh MPHF, kaba la ïathuh ba ïaka Rotary Club Jowai ( Code No.30548) la seng haka snem 1994 bad ha u snem 1995 ka la ïoh ïaka jingithuh na ka Rotary International.

Ka Rotary Club Jowai kum ka seng treimon sngewbha ban tei iaka imlang sahlang haka jingïatreilang bad ka Jaintia Fishing Association ka la pynshna ïaka check dam ha Treïongriang bad lyngba ka jingsynñiang jong u Prof RC. Laloo MLA barim ka Rotary Club Jowai ka la ïoh ïaka kali kit ïap briew kaba la aiti haka tnad pulit bad kawei ka kali Ambulance kaba la aiti sha ka KJP Assembly Hospital Jowai na ka bynta ban kit ïaki nongpang.

Ka Rotary Club ka la ïashim bynta ruh ban pynneh pynsah ïaka mariang da kaba thung ïaki tynrai dieng ha kylleng ki jaka jong ka West Jaintia Hills, kala sam khusnam Vocational Award ban ithuh ia u synniang u bynhei ki nongshong shnong ha ki kam bapher bapher bad ka ai jinghikai ïaki khynnah ka shnong Mookaswan ki bym nang ban thoh bad ban pule kaba tip kum ka ‘Literacy Campaign’ bad kiwei kiwei ki kam ba bha.

U Rtn Manas Chaudhuri haka jingkren ula ong ka Rotary Club ka ïeng haka nongrim ban shakri na ka bynta bha ka miat jong ka imlang sahlang bad ka pynïajan ruh bad ki briew kiba na kiwei ki ri jong ka pyrthei. Ula kyntu ïaki dkhot Rotarian ban long ki nuksa ba bha ïa kiwei bad da kaba leh kumta ka Rotary Club kan ïoh ïaka jingshaniah na uba bun ba lang.

Ha kane ka sngi la pyllait paidbah iaka souvenir bad la pynphuh pynphieng ïa kane ka sngi da ki jingrwai bad jingshad.