Pynkut noh iaka jingrakhe Diamond Jubilee ka Seinraij HSS Jowai

Syllad | The Rising MeghalayaDecember 12, 2024

Ka Seinraij Higher Secondary School, Jowai haka 11 tarik Nohprah kala pynhap pyrda noh iaka jingrakhe dap 60 snem ne Diamond jubilee jong ka skul kaba la seng ha u snem 1964 ban sam jingnang jingstad shaki khynnah.

Ha kane ka sngi pynkut, la wan ban donlang da u symbud myntri rangbah ka jylla ma Sniawbhalang Dhar, u MLA ka thain ma Wailadmiki Shylla, u Dolloi ka Elaka Jowai Ma Puramon Kynjing, u president ka seinraij ma H. Toi, ki kmie ki kpa, ki nonghikai, ki khynnah skul nalor kiwei kiwei.

Ban pynshit pynshngain iaka jinglehkmen ki khynnah skul ki la iashim bynta shitrhem da ki jingpynbyrnia bapher bapher kaba kynthup ia ki jingrwai jingshad bad kiwei kiwei.

U Ma Sniawbhalang Dhar haba ai jingkren ula ai ka jingïaroh iaki nongseng kiba iohi jngai iaka jingkordor jong ka jingnang jingstad bad ula iaroh ruh iaki nonghikai ba wat haba ki ioh iaka jingsiew kaba rih hynrei ki trei shitom ban kyntiew iaka pule puthi jong ki khynnah.

Ula kyntu ruh ïa ki khynnah ba kin leh tip sngi bad trei minot haki jingpule ki jong namar kamdon kano kano ka bor kaba lah ban khang iaki ban poi sha ka thong.

Ha kane ka sngi la pynkup burom ruh ia u Founding Member bad Headmaster ba nyngkong ka ME School u Ma S Ram Passah bad iaki nonghikai barim.

Hashwa kane la ioh ka jingkren na u Ma Puramon Kynjing, Dolloi ka Elaka Jowai, ka principal ka Kong Wompher Laloo, ki kyntien pdiang na ka Kong Finland Passah, Asst. Headmistress kumjuh na u Mariyoo Rymbai, Headmaster ka Upper Primary School.