Pynkut noh iaka Wildlife Week ha Jowai, pynkup burom ia kiba pyllait im iaki mrad khlaw

Syllad | The Rising MeghalayaOctober 21, 2024

Ka ophis Divisional Forest Officer, Jaintia Hills Wildlife Division, Jowai haka 21 tarik u Risaw kala pynkut noh iaka taiew lehkmen Wildlife Week ha Iungwalieh Tpeppale. Ka phang kalong “Wildlife Conservation through coexistence”.

Ha kane ka sngi la donlang u kongsan SM Sahai IFS Principal Chief Conservator of Forest (Wildlife), Shillong, ka Kong DV Lyngdoh ADC West Jaintia Hills District, u PK Agrahari, IFS Chief Conservator of Forests (Wildlife), Shillong, u P Khade IFS, Assistant Conservator of Forest Jaintia Hills Territorial Division, Jowai, nalor kiwei kiwei.

U kongsan u SM Sahai IFS Principal Chief Conservator of Forest (Wildlife), haka jingkren, ula pyntip ba ka Jylla Meghalaya ka don haka kyrdan kaba ar haka ri haka jingdon ki Community Reserve Forest bad shen kan sa tam ruh iaka Nagaland bad kan sa long kaba nyngkong hapoh ka ri ha haka jingbun jong ki Community Reserve Forest.

Ha kaba iadei bad ka jingiada iaki mrad ki mreng, u SM Sahai ula ong kamdei ban iada tangba don ka jingkhang ne jingpynshitom, hynrei dei ban don ia kata ka mynsiem ban ieid iaki mrad kumjuh iaka mariang bad ban sngewthuh ruh ba ka jingdon jong ngi, ka shong ka jingdon jong baroh ki mrad khlaw bad ki marpoh khyndew.

Ula kyntu ruh ia baroh ban pyndep iaka kamram da kaba pyrshang ban sumar sukher bad pynneh pynsah iaki mrad ki mreng namar lada ki jingthaw ba im ki don haka jingeh, ka jinglong briew ruh kan don haka jingeh.

Ha kane ka sngi ka tnad kala sam khusnam sha ki khynnah na ki skul bapher na district kiba jop haki jingiakop Painting, Essay bad Extempore Speech.

Nalorkata la pynkup burom ruh da ka khusnam ‘Wildlife Samaritan Award’ sha ki riew shimet bad kynhun kiba pynlait im ïa ki mraw khlaw kynthup 18 ngut ki riew shimet, 4 ki kynhun kiba na West Jaintia Hills District bad 6 ngut na East Jaintia Hills District.

Hashwa kane ka Kong N Laloo IFS Divisional Forest Officer, Jaintia Hills Wildlife Division, Jowai haka jingkren maitphang kala pyntip ba hapoh rilum Jaintia la don 28 tylli ki khlaw kiba tip kum ki Community Reserve Forest.

Kiwei de kiba la ai jingkren ki long ka Kong Marjona Suchiang Forest Pleader, West Jaintia & East Jaintia Hills District haka jingialang kaba la pyniaid da u B Japang MFS, Assistant Conservator of Forest, Social Forestry Division, Jaintia Hills Jowai.

Iaka jingialang la pynkut da ki kyntien khublei na u S. Law Range Forest Officer, Jowai & Umkiang Wildlife Ranges.