Pynkut noh ka Bethany Hospital Outreach, Nongpoh ia ka jingrakhe dap 10 snem

Syllad | The Rising MeghalayaAugust 10, 2024

Ka Bethany Hospital Outreach, Nongpoh, ka la pynkut ia ka jingrakhe dap 10 snem jong ka ha ka 9 tarik mynta u bnai da ka jingialang kaba kyrpang kaba la pynpaw ia ka jingaiti kaba khlem sangeh ha kane ka jingai jingshakri ba shiphew snem jong ka na ka bynta ka imlang sahlang.

Ha kane ka sngi la ia don lang ka Myntri ka tnat ka Koit ka Khiah ka Dr. M. Ampareen Lyngdoh kum ka Kongsan, bad u MLA ka Nongpoh u Mayralborn Syiem kum u Symbud kongsan.

Ki bynta kiba kongsan jong kane ka prokram ki kynthup ka jingplie ia ka Dialysis Unit jong ka hospital, kaba dei kaba nyngkong eh hapoh ka District, ka jingpyllait ia ka thup sahkynmaw bad ka jingplie ia u motdur jong u (L) Dr. John L. Sailo Ryntathiang.

Haba kren ha ka jingialang, ka Dr Ampareen ka la ai ka jingiaroh ia kane ka hospital kaba la lah ban ai ia ka jingsumar kaba paka sha ki nongshong shnong ka thain Nongpoh bad ki shnong ba marjan jong ka. Ka la ban jur ruh ia ka jinglong ba kongsan jong kane ka hospital ha ka jingai jingshakri da ka jingieit, ka jingaiti  bad ka jingkut jingmut ia kaba la btin lynti da u (L) Dr John L Sailo uba dei u nongseng jong ka Bethany Hospital.

Nalor kata ka pynpaw ruh ka jingsngew nguh ia ka hospital kaba la sdang ia ka Dialysis Unit ha Nongpoh, kaba long u mawjam ba kongsan ban pynbiang ia ki lad jingsumar hapoh ka thain.

U Symbud Kongsan u Bah Mayralborn Syiem uba dei ruh u MLA ka thain ha ka jingkren u la pynkynmaw ia kawei ka jingkren ai mynsiem jong u Dr Sailo uba la ong, “Nga nud ban phohsniew,” da kaba pyniasyriem bad ka jingphohsniew jong u Martin Luther King Jr. na ka bynta ki nongshong shnong ka America.

U la pynpaw ruh ia ki laitylli ki bynta ba kongsan jong ka Bethany Hospital; Kata ka rukom aijingsumar kaba bha kaba ka la ai na ka bynta ka District, ka jingplielad ha ka ioh kam ioh jam, bad ka jinglong kaba pdiang sngewbha da ki nongtrei jong kane ka hospital.

Ka Director Hospital Achula D. Sailo ka la pynkynmaw kumno ba ha kine ki shiphew snem mynshwa kane ka jaka kaba ka hospital ka ieng mynta ka dei ka lyngkha rep kba. Ka jingkhlad ba sngewsih ka kurim jong u shokidar katba dang pynkit sha Shillong ban ioh jingsumar ka la ktah shibun ia u (L) Dr Sailo. Kane ka jingjia bad ki jingeh kiba ki nongpang kiba hap ban leit jngai sha Guwahati na ka bynta ka jingsumar, ka la pynkhih ia ka jingkut jingmut jong u Dr. Sailo ban plie ia ki lad jingsumar na ka bynta ka jingdonkam jong ki nongshong shnong ha ki thain nongkyndong.

Hadien ki jingkren, u Rev. Lyndan Syiem, Pastor-in-Charge jong ka Balang Presbyterian Mawroh, Shillong, u la ialam ia ka jingiaseng nguh da kaba pynpaw ia ka jingsngewnguh ia ki jingjop jong kane ka jaka sumar bad na ka bynta ka jingkiew shaphrang jong kane ka hospital ha ki sngi ki snem ki ban dang wan.