Pynkut noh ka HNLC ia ka jingiakren iasuk bad ka Sorkar bym shim khia ia ki jingdawa

Syllad | The Rising MeghalayaJanuary 3, 2024

Ka Seng kieng atiar Hynniewtrep National Liberation Council (HNLC) haka Balang kala pynbna ba kan weng noh na ka jingiakren iasuk kaba dang iaid shakhmat bad ka sorkar pdeng kumjuh ka sorkar jylla namar ka jingbym shimkhia halor ki jingdawa ba kongsan jong ka.

Ka Seng HNLC lyngba u Chairman-cum-C-in-C Bah Bobby Marwein bad u General Secretary-cum-Publicity Secretary Bah Sainkupar Nongtrawka la phah ia ka shithi sha ka Ministry of Home Affairs lyngba u AK Mishra uba long u Adviser jong ka MHA ba peit ia ka thaiñ shatei lammihngi.“

Katkum kane ka shithi ka Seng ka la ong ba kane ka jingweng noh na ka jingiakren iasuk kaba la sdang ha u snem bala dep ka long ba ka sorkar kam shym la pdiang ia ki jingdawa ba kongsan jong ka.

Ka jingiakren iasuk hapdeng ka Seng HNLC bad ka sorkar pdeng kumjuh ka sorkar Jylla ka la long naduh une u snem bala dep ha kaba ki ksiang na ka sorkar jylla lyngba u Bah Peter S Dkhar bad na ka HNLC lyngba u Bah Sadon Blah ryngkat ka jingiadon lang ruh u Vice Chairman, u Bah Manbhalang Jyrwa uba hadien u la iehnoh ia ka kam na ka Seng.

Na ka liang u Bah Sainkupar lyngba u kyrwoh u pyntip ba ki jingdawa kiba ka seng ka dawa ka dei kaba la aiti sha ka Sorkar Pdeng da u Bah (L) Cheristerfield Thangkhiew naduh ka 16/01/2021.

“Wat hapdeng ka jingpyrshang jong ngi ban ban jur bad iai ban ia ki jingdawa jong ngi lyngba u nongrahktien, Bah Sadon Blah, ka Sorkar kala pyni ia ka jingbym shimkhia ia ki jingdawa jong ngi,” ong ka kyrwoh.

Haba kdew halor ki santylli ki jingdawa ba kongsan jong ka Seng, u Bah Nongtraw u la ong ba ka HNLC ka la kyrpad ban weng noh ia ka jingkhein beain ia kane ka Seng bad ruh ban weng noh ia baroh ki case kiba dang sahteng pyrshah ia ki nongialam bad ki dkhot jong ka khnang ba kin don hapdeng ka jingshngain haba wan ban iashim bynta ha ka jingpynlong ia ka jingiakren iasuk.

Ka Seng ka la pynpaw ruh halor ka jingdonkam ban plie ia ka lynti iaid kaba shngain na ka bynta ki nongialam bad ki dkhot jong ka khnang ba kan don ka jingshaniah haba iashim bynta ha ka jingiakren iasuk.                             

Nalor kata ka Seng ka la buh ruh ka jingtyrwa ban thung ia ki nongmihkhmat bala aibor u ban rahktien bad pyniaid shakhmat ia ka jingiakren. Kumjuh ka la dawa ruh ban pyllait noh ia baroh ki dkhot ka Seng bad ki riew shimet kiba shah kem halor ka jingsuba donkti bad kane ka kynhun kiba dang don hapdeng ka jingshah set along.

Lah ban kdew ba dang ha kine ki khyndiat bnai ba la dep ka liang ka sorkar ka la bthah ia ka Seng HNLC ba kan phah da ki nongialam ba hakhmat jong ka na ka bynta ban bteng biang ia ka jingiakren, hynrei naduh katei ka por ka jingiakren ka la sangeh noh.

Shuh shuh u Bah Nongtraw ula ong ruh ba ka Seng kala iai ban bad aiktien na ka por sha ka por lyngba ki lad pathai khubor bad sha ki ksiang bad sha ka Sorkar ban kyntu ba kim dei ban pynmih ia kino kino ki jingkhot hajir kaba lah ban nang aiding shuh shuh, hynrei ym shym la don ba pynsngap bad ka jinglong jingmang kala nangheh bad khlem don nongrim.