Pynkut noh ka Iingkashari ia ka mukotduma halor ki kynrum kynram ha ka skulbah NEHU

Syllad | The Rising MeghalayaDecember 7, 2024

Ka Iingkashari Meghalaya High Court ha ka 6 tarik Nohprah ka la pynkut noh ia ka mukotduma (PIL) hadien ba ka jinglong jingman ha ka skulbah North Eastern Hill University (NEHU) ka la sdang ban wanphai pat sha ka jingjai -jai.

Haba pynbna ia kane ka hukum, ka kynhun ki nongbishar kaba kynthup ia u Chief Justice IP Mukerji bad u Justice B Bhattacharjee ka la ong, “Kane ka iingkashari ka la shimkhia ha kaba iadei bad ki kynrum kynram kiba la jia ha NEHU kaba la wanrah da u Advocate P Yobin. Mynta ka sngi, u la pyntip ba ka jinglong jingman hapoh kane ka skulbah ka la nang wanphai sha ka jingjai-jai. Ia ka eksam ba la buh ban pynlong la pynjlan bad ka jingshim klas ka la sdang iaid shakhmat.”

Ka la ong ruh ba ka Enquiry Committee ba la thung da ka Ministry of Education, Department of Higher Education, New Delhi ka dang tohkit ia ki mat kiba don hakhmat jong ka hadien ba la pynjlan ia ka por ban ai ia ka kaiphod da ka sorkar pdeng.

Ia ki jingshisha la pynthikna da u K Khan, AAG uba mihkhmat ia ka Jylla, u nongiasaid ain S Sen uba mihkhmat ia ka NEHU bad u K Gurung uba mihkhmat ia ka Sorkar India.

“Ngi tharai ba ka jingthmu jong kane ka jingmudui (PIL) ka la urlong. Ngi pynkut noh ia kane ka jingmudui ryngkat bad ki jingpeit bniah bad ka jinglaitluid ban pyntreikam biang lada kano kano kan mih biang ha ki por ki ban wan,” ong shuh shuh ka kynhun ki nongbishar ha ka hukum jong ka.