Pynkut noh ka Kiang Nangbah Government College iaka prokram hikai halor ka jingseng kam lajong

Syllad | The Rising MeghalayaFebruary 26, 2024

Ka shnat Entrepreneurship Development Centre (EDC) bad Entrepreneurship Cell (E-Cell), jong ka  Kiang Nangbah Government College, Jowai, ka la pynkut noh ïa ka  Faculty Development Program (FDP) kaba san sngi lynter halor ka Entrepreneurship Development ha ka 23 tarik u Rymphang 2024. Kane ka prokram ka hap ha ka “Establish, Develop and Manage Entrepreneurship Development Centre and Incubation Centre in the Educational Institute of North Eastern Region” kaba la bei pisa daka North Eastern Council (NEC), Shillong, ka sorkar India lyngba ka Indian Institute of Entrepreneurship (IIE), Guwahati. 

U Dr. Blessing Roy Suchiang uba long u  Asst. Professor jong ka College,  uba lamkhmat ïa kane ka program, kumjuh ruh uba long u Project Incharge ka EDC bad Member Secretary jong ka E-Cell, u la kdew ba lah pynlong ïa kane ka program kum shibynta ban ai mynsiem halor ka jingseng kam lajong bad banbsam jingmut sha ki dkhot nongtrei jong ki college bapher bapher kiba don ha East & West Jaintia Hills District ka jylla Meghalaya, hapdeng ka jingtip ba kongsan bad ka jingtbit ban sara kylla pat na ka bynta ki samla pule ba kwah sengkam lajong.

Kane ka program, ka dei kaba la pynlong ha ka 19 haduh ka 23 tarik u Rymphang 2024, hapdeng kine ki sngi la sakhi ka jingïashim bynta shitrhem napdeng ki dkhot nongtrei na ki tnad bapher bapher jong ki college na kitei ki artylli ki district. Ha kitei ki sngi ka lah don ka jingïalang bad ïamir jingmut bapher bapher ba lah don bynta ban wan ai jinghikai ruh da ki riewshemphang bad kito kiba lah don bynta ha ka jingsdang bad trei ki kam lajong.

Ka  FDP ka dei kaba ai jinghikai ïa ki nongwan ïashim bynta ha ki mat bapher bapher jong ka jingseng kam lajong, kum ka jingpynkhreh, ka jingpynwandur halor ki kam ba thmu ban trei kumjuh ruh ban tip halor ki aiñ ki kyndon bad ka jingseng kam lajong, ka jingkyrshan ka sorkar bad ki lad ïoh skhim lyngba ka  MSME & DCIC, ka jingpynïaidïew bad pynpaw nam, ban sngewthuh ïa ka ïew, bad ki shnat ba lah ban nang ai jinghikai, bad ka jingplie lad halor ka jingseng kam lajong ïa ki nongadang thymmai.

Ki nongïashim bynta ki ïoh ruh ka jingpynshai kaba thikna bad ki jingai jingmut na ki nongai buit bad pynshlur ïa kiba thmu ban sengkam lajong ban jurip bniah shuwa ban trei hi ka kam dalade ban sngewthuh kham bha.

Ki program ba kongsan ha kitei ki sngi ki kynthup ka jingkren na ki nongsengkam lajong kiba pawnam, ka jingïamir jingmut hapdeng ki riewshemphang, ki kabu bad ki jingduna ha ka sawdong sawkun ka jingseng kam lajong, bad ka jingïamir jingmut hapdeng ki nongwan ïashim bynta.

Ka Dr. Easter Meena Blah, kaba long ka Principal ka Kiang Nangbah Government College, ka lah pynpaw ka jingsngewnguh ïa ka jingïashim bynta shitrhem jong ki dkhot nongtrei na ki college bapher bapher. Ka la pynpaw ruh halor ka jingdonkam ban pynkup bor ïa ki samla pule ba kin long ki nongaikam aijam bad nongwanrah jingkylla ha ka imlang sahlang.

Ka jingjop ka FDP ka pyni shai ba ka Kiang Nangbah Government College kala kut jingmut ban kyntiew iaka jingseng kam lajong bad thaw lad lynti da ki buit thymmai halor ka sengkam iaki nongtrei bad ki samla pule.