Pynkut noh ka sorkar ia ka kontrak pynmih bording na wah Kynshi bad wah Khri 

Syllad | The Rising MeghalayaSeptember 12, 2023

Ka kynhun Myntri ka sorkar jylla mynta ka sngi ba Ar ka la shim ia ka rai ban pynkut noh ia ka jingiasoi kontrak da ka sorkar barim na ka bynta ka projek pynmih bording na ka wah wah Kynshi bad wah Khri.

Kane ka jingiasoi kontrak na ka bynta ban pyntrei ia ki artylli ki projek bording, kata Kynshi stage-I bad  Upper Khri stage I & II ka dei kaba la ia soi ha ka por da ka sorkar la kham slem.

Watla katta u Myntri Rangbah ka jylla u la pynpaw sha ki lad pathai khubor hadien ka jingialang ba kane ka jingpynduh noh ia kane ka jingiasoi kontrak kam mut satia ban pynkut noh syndon ia ki kam pynmih bording lyngba kine ki wah, hynrei na ka liang ka sorkar kan wad da kiwei pat ki lad ki lynti ha kaba iadei bad kane ka kam pynmih bording, kata lyngba kine ki juh ki kompeni ne da kiwei pat.

Ia ka Kynshi stage-I la iasoi kontrak ha u snem 2007 katba ia ka Upper Khri stage I & II la ia soi ha u snem 2012-13.

“Namar ka jinghiran pisa ban pyntrei ia kine ki projek bad namar ka jingheh palat jong ka dor nalor ka jingshim por da ki kompeni bapher bapher ban pyntreikam ia ki, kumta na ka liang ka kynhun Myntri ka la shim ia ka rai ban pynkut noh ia baroh kine ki artylli ki projek bording,” ong u Myntri Rangbah.

Haba kdew halor ki technolgy kiba thymmai ba la pyntreikam ha ki kam pynmih bording ha kaba ia ki pump storage lem bad kiwei pat ki kor koi bor la lah ban pyndonkam bad nalor ka pyniakhleh ia ka um ba la pyllait na kawei ka projek bad ban pyndonkam sha ki jaka ba sha them na ka bynta kawei pat ka projek kum ha kaba iadei bad ka Upper Khri stage I & II, u Myntri Rangbah u la ong ba donkam ban wanrah jingkylla na ka bynta kine ki projek pynmih bording.

Kumta ruh u la ong ba na ka liang ka sorkar bad ka tnat kin bishar bniah halor kane ka bynta bad kyrmen ba shen kin lah ban pynpaw ia ka jingkyrmen ban pyniaid shakhmat ia kine ki projek ha ka rukom kaba thymmai.