Pynkut noh ka STEDS ia ka trekking & camping sha u Lum Bah Bo Bah Kong, sakhi ia ka jingitynnad ka mariang

Syllad | The Rising MeghalayaNovember 29, 2023

Ka Sonapyrdi Tourism & Economic Development Society (STEDS) ka la lah ban pynkut ia ka jingiaid kjat bad sahmiet (Trekking /Camping) sha u Lum Bah Bo Bah Kong. Kane ka jingiaid kjat bad sahmiet ha une u lum uba don ia ka khana puriskam kala sdang naka 23 tarik Naiwieng bad pynkut noh ha ka 25 tarik Naiwieng da kaba sah shi miet ha Keria kaba don hapoh ka Narpuh Wildlife Sanctuary bad shi miet pat ha Wah Lukha ki bynta ba shaneng shnong Khatdum kaba jngai 2 kynta da kaba iaid kjat na Khatdum.

La btin lynti (guide) ia katei ka jingiaid kjat ne trekking da ki nongtrei ka tnat wildlife ha ka jingdonlang u bah Chanborki Law uba dei u Ranger Officer, bah M. Syrpuh Beat Forest Officer, Sonapyrdi Beat bad katto katne ngut ki staff. Ia kane ka jingiaid kjat bad sahmiet la pynlong hadien bala ioh jingbit na ka tnat Wildlife namar kane ka jaka ba iaid kjat bad kumjuh utei u lum ki don hapoh ka Narpuh Wildlife Sanctuary.

Kiba ia shim bynta ha katei ka trekking ki long u bah Chibor Wahlang bad ka team jong i ha ryngkat ruh ka jingdonlang I Doctor S. Momin incharge CHC, Khliehriat lem bad kiwei ki rangbah bad samla na ki shnong bapher bapher. Baroh ki la don haduh 31 ngut kiba la wan iashim bynta.

Ka jingthmu jong ka Society haba pynlong ia katei ka trekking ka long shibynta ban iohi bad sakhi da la ki jong ki khmat ia utei u Lum ba pawnam hapoh thaiñ Narpuh bad kumjuh hapoh district hi baroh kawei. Ka trekking ka long ruh kum shi bynta ban pynshlur ia kiwei ban ithuh ban ieit ia ka mariang, ki mrad ki mreng, ki sim ki doh, ban pynneh pynsah ia ki jingkordor jong ka mariang kiba u Blei Nongbuh Nongthaw u la ai, bad ruh ban ioh ia ki met ba shait ba khlain.

Ka Narpuh Wildlife Sanctuary ka dei ka sanctuary kaba ar ka jingheh na kiwei pat kiba don ha ka jylla. Ka jingheh/jingïar ka long 59.9 Sq.Km ia kaba la ithuh da ka sorkar naduh u snem 2014.

U Bah KS Suchiang President ka Society bad u Bah Tackmon L Gympad ki la pynpaw ka jingsngewkmen da kaba ainguh ia u Blei ba la lah ban pynlong ia kane ka program bad la lah ruh ban pyndep ia ka jingthmu kumba la angnud.

Ha ka jingkren u Bah Tackmon L Gympad Secretary ka Sonapyrdi Tourism & Economic Development Society u la ong ba ka Society kan nangiaid shakhmat ban pynlong shuh shuh kum kine ki program trekking ha ki katto katne tylli ki jaka ba pawnam hapoh ka thaiñ khnang ban ngam jylliew bad ban ioh jingtip shuh shuh ia ki jingdon jingem jong ka mei mariang.

Shuh shuh u la ai ruh ka jingiaroh ia ka tnat Forest  Dept namar ka jingiohi jngai jong ka ban pynneh pynsah ia kane ka khlaw ba rben da ka jingdon ki diengbah diengsan.