Pynkynmaw biang ki VEC Lumshnong C&RD ba dei u BDO Wapung ba khanglad ban submit bai tiar ka skim bylla shi spah sngi

Syllad | The Rising MeghalayaSeptember 12, 2024

Ki Village Employment Council (VEC) jong ka Lumshnong C&RD Block Association hadien ka jingynshai u BDO Wapung C&RD Block, uba dei khmih ruh iaka Lumshnong C&RD Block, kila pynpaw ba kim lah satia ban pdiang iaka jingkren ialam bakla jong u bad kynnoh ba ki dei ki VEC ba slem ban submit iaka bai tiar (material cost) haka por kaba biang.

Halor kane ka jingshah kynnoh kylla ki VEC jong ki shnong bapher bapher kiba hap hapoh Lumshnong C&RD Block, kila khot jingialang paidbah (general meeting) haka 9 tarik Nailur ban iakren sani halor kane ka jingpynshai bad ka jingshah kynnoh kylla ki VEC wat hadien bala khang lad iaki ban submit iaki bai tiar jong ka skim MGNREGA.

Na kaliang ka synjuk ki VEC, kila pynpaw iaka jingsngew thamula ia kane ka jingpynshai jong u BDO bad kila ong ba ka dei ka bym don nongrim namar ki VEC ki juh submit ia ki Utilization Certificate (UC) ha ka por kaba biang shwa u Financial Year namar ki la tip shai ban submit ha ka por kaba biang. Kila pynpaw ruh ba da ki phew tylli ki snem ki la trei ia kane kam, hynrei mynta u snem une u BDO um shah ia ki nongtrei (staff) jong u ban kyntiew (enter) ia ki Materials bill jong ki wat la ki submit ha ka por kaba biang ruh.

Ka VEC Lumshnong C&RD Block Association kala pynkynmaw biang ba ki dkhot jong ka Association da ka jingsngewkhia ia kane ka kam ki la dep ban ia kynduh ia une u BDO ha kine ki bnai ba la dep, hynrei ka jubab kaba ki ioh na u ka long ba u ong “Ka State kam shah ban enter ia ki materials bill jong ki” bad u la ai jingmut ruh ia ki ban ia kynduh ia ki bor ba halor.

Halor kane ka nongrim ba ka Association ka la leit ban ia kynduh ia ka Project Director DRDA East Jaintia Hills District, Deputy Commissioner East Jaintia Hills District bad ia ka Joint mission Director SRES ban ioh ia ka jingpynshai, la ong ka VEC Assocaition bad bynrap “hynrei sngew phylla ba i Joint Mission Director i la pynshai ia ngi ba kam don kum kata ka ain ban nym shah ban enter ia ki materials bill hadien ba la dep ban trei ia ka kam, shuh shuh ka la ong ba la dep ban pyllait ia ka bai materials kaba duna 15 Crore, ban ai sha baroh ar tylli kitei ki C&RD block (Wapung bad Lumshnong), hynrei sngewsih ban iathuh ba ym don tang kawei ruh ka VEC kaba don hapoh Lumshnong C & RD Block kaba ioh bai materials jong une u Financial Year 2023-2024.”

Ka VEC Association kala pynpaw ba une u BDO u la thok pyllein pyllein da kaba kam ba ula dep ban pyllait bai materials sha kine ki VEC kiba don ha Lumshnong C & RD Block. “Shiphang u ong bymshah ka sorkar jylla ban enter, shiphang pat u kynnoh ba slem ban submit ia ki materials bill, ym sngewthuh sngewthaw shuh kane ka ka jingkyllaiñ khlieh khlieh tdong tdong,” ong ki VEC

Kila buh jingkylli ruh ia une u BDO, ba balei um shym la kren shai, hynrei u la kynnoh pynban ia ka sorkar bym shah ban enter ia ki bills bad ban kynnoh pat ia ki VEC namar ki slem ban submit kane ka bymlah ban pdiang, ka Association ka pyrshah ia ka jingkren kyllaiñ une u BDO.

La ong ruh ba hadien ka jingialang ki VEC jong ki shnong bapher kila mih ban leit ia kynduh biang ia une u BDO da ka jingthmu ban ia kren markhmat bad ki VEC kumba u la khot ha ki lad pathai khubor, hynrei une u BDO um don satia ha ophis, wat la dep ban ai jingtip shwa ia u ruh, haba pyrshang ban phone ia u da ki phew sien ruh u khlem shim satia iaka phone (Receive).

Kumta halor kane ka bynta ki VEC baroh ki la pynpaw ia ka jingsngew lyngngoh ia kane ka jingleh jong une u BDO, bad hadien kane na ka liang jong ki VEC ki la ai noh da ka jingthoh khnang ba une u BDO un pynshai ia kane ka jingkynnoh jong u ia ki VEC kiba don ha Lumshnong C & RD Block.