Pynkynmaw ka JSU ban buh ia u mot dur u Kiang Nangbah ha Lad Nartiang

Syllad | The Rising MeghalayaDecember 30, 2023

Ka Jaintia Students’ Union (JSU) sa shisien kan leit dawa biang na ka sorkar ba kan bei pisa ban shna ia u mot dur jong u Woh Kiang Nangbah ha Lad College.

Ia kane ka jingdawa la pynsngew da u general secretary ka JSU u Treiborlang Suchen haka jingwan buh syntiew kum ka dak ka jingkynmaw burom iaka lyngkhuh sngi iap ba 161 snem u Kiang Nangbah khlawait bad u nongialeh laitluid iaka sorkar Bilat haka 30 tarik Nohprah ha Lum Mooliksoo.

U Treiborlang Suchen ula ong ba haki snem ba la leit ka JSU ryngkat ka Synjuk Waheh Shnong Jowai ki la dep ban phah jingthoh shaka sorkar MDA-I na ka bynta ban bei pisa ban shna ia u mot dur jong u Woh Kiang Nangbah ha Lad College ne Lad Nartiang kaba don hajan ka Kiang Nangbah Govt. College Jowai haka jaka jong ka tnad Transport hynrei kaba sngewsih ka long ba na ka liang ka tnad ka kyntait ia kane ka jingtyrwa.

Ula ong ka jingdon u mot sahnam ha katei ka jaka kan long ruh ka lad ban ai mynsiem iaki pateng ban dang wan ba kin don ka mynsiem ialeh kum u Kiang Nangbah.

Ula ong ba na ka liang ka JSU bad Synjuk Waheh Shnong Jowai kin sa leit ban dawa biang na ka tnad Transports bad Art & Culture ka sorkar Jylla ban pynioh ia katei ka jaka bad ba kan long ruh kawei na ki jaka ka ban pynitynnad iaka sor Jowai.