Pynkynmaw ka NPP West Jaintia Hills ia u Conrad ia ki kam pynroi ba sahteng, kular ban pyllait ia tulop JHADC

Syllad | The Rising MeghalayaJune 6, 2024

Ka District Executive Committee jong ka National People’s Party (NPP) West Jaintia Hills mynta ka sngi 6 tarik u Jylliew kala leit ban kynduh ïa Myntri Rangbah ka Jylla u Conrad K. Sangma, halor ki kam ba sahteng hapoh ka West Jaiñtia Hills.

Kine ki mat ki kynthup naduh ka Iawmusiang Market Complex kaba la sahteng da ki phew phew snem, kaba ar ban pyllait noh ïaka tulop ki nongtrei ka JHADC bad ka bhah pisa jong ka Council ka ban pynsuk ïa ka Council ha ka ban siew tulop manla u bnai, khnang ba kan nym don ka jingthut ha ka rukom siew tulop.

Ha kane ka jingleit kynduh ka Committee ïa u Myntri Rangbah la ïalam khmat da u MLA ka 2- Jowai ma Wailadmiki Shylla, u CEM ka JHADC ma Thombor Shiwat, u President District ma Octomewot Lamin lem bad ki nongtreikam jong ka Party.

Ha kane ka jingleit kynduh ki dkhot ka Committee kila ïoh lad ban ïathir jingmut sani bha halor kitei ki kam kiba hakhmat eh na ka bynta ka jingmyntoi ki paidbah nngshong shnong ka West Jaiñtia Hills.

Ha kaba ïadei bad ka Iawmusiang Market Complex na ka liang u myntri rangbah ula kular ban pyllait pisa noh ïa katei ka Market Complex Iawmusiang hapoh kine ki khyndiat sngi ban wan.

Kumba long mynta ki nongtrei ka JHADC ki shem jingeh haduh katta katta halor ka jingduh tulop kaba da ki phew phew bnai bad ka lah ruh ban kot sha ka shisnem duna, halor kane ki dkhot ka Committee NPP kila kyntu na u Myntri Rangbah ban pynbeit kloi noh ïa kane ka jingeh jong ka Council.

Ha ka jingïakren mynta ka sngi u Myntri Rangbah ka jylla ula kular ban pyllait noh ïaka tulop jong ka Council hashwa ka lehñiam Behdieñkhlam mynta u snem, khnang ba ki nongtrei ka Council kin ïoh ban pyndap pynbiang ïa ki jingdonkam ha kiba bun ki liang.

Halor kane da ka jingïohi jngai ka Committee bad ka jingïamir jingmut sani bha kala sngewbit ban wanrah ïa kane ka mat rukom pyntreikam kaba ki khot haka ktien nongwei (Financial Reform) ban pynbeit ryntih iaka kam pla tyngka ka Council, khlem da ïaid shuh lyngba ki tnad (department) bapher bapher.

Na ka por sha ka por ka jingbym biang ka rukom ïoh tulop ki nongtrei ka Council ka dei na ka daw bah ka jingbun palat ki tnad sorkar kiba hap ban ïaid lynba haduh ban da poi ka pisa sha ka Council bad kane kala wanrah ha ka jingdkoh ka rukom pynpoi pisa na ka bhah jong ka sorkar (share).